ИСТАНБУЛ (AA) – Нова научна студија открива необични промени во крвта кај пациентите со продолжен Ковид, укажувајќи на интеракции меѓу малите згрутчувања и изменетите имунолошки клетки, што според научниците може да ги објасни долготрајните симптоми на состојбата, јавува Анадолу.

Истражувањето, објавено во „Списанието за медицинска вирусологија“ покажува дека кај пациентите со продолжен Ковид-19 има значително повисоки нивоа на таканаречени „микро згрутчувања“ – абнормални групирања на протеини одговорни за згрутчување на крвта.

Дополнително, забележано е и засилено создавање на структури познати како неутрофилни екстрацелуларни стапици (NETs), кои ги ослободуваат белите крвни клетки за да ги заробат патогените.

Истражувачите велат дека интеракцијата меѓу ситните згрутчувања и неутрофилните екстрацелуларни стапици може да предизвикува широка воспалителна реакција и продолжени симптоми како замор, „мозочна магла“, болки и отежнато дишење.

„Овие откритија укажуваат на постоење на физиолошки интеракции меѓу микро згрутчувањата и неутрофилните екстрацелуларни стапици кои, кога се нарушени, може да станат патогени“, изјави Алан Тиери од Институтот за истражување на канцер во Монпелје, коавтор на студијата.

Кај пациентите со продолжен Ковид, неутрофилите покажале промени што ги поттикнуваат да исфрлаат ДНК и ензими, формирајќи неутрофилни екстрацелуларни стапици за кои научниците сметаат дека можат да ги стабилизираат и зголемат микро згрутчувањата, спречувајќи нивно разградување во организмот.

„Сугерираме дека зголеменото формирање неутрофилни екстрацелуларни стапици може да придонесе за стабилизација на микро згрутчувањата во циркулацијата, што потенцијално доведува до штетни ефекти кои каузално придонесуваат за синдромот продолжен Ковид“, се наведува во истражувањето.

Студијата споредила крвна плазма од пациенти со продолжен Ковид и од здрави доброволци, при што било утврдено дека микро згрутчувањата кај пациентите не само што се многубројни, туку и значително поголеми.

Научниците велат дека резултатите даваат нов увид во биолошките механизми зад продолжениот Ковид и може да отворат пат кон развој на целни терапии насочени кон намалување на формирањето микро згрутчувања или ограничување на активноста на неутрофилните екстрацелуларни стапици.