A. Eda Ünlü Özen
24 Септември 2017•Ажурирај: 24 Септември 2017
АНКАРА (АА) - Турскиот премиер, Бинали Јилдирим, денес во Анкара изјави дека никогаш со одобрување нема да гледа на промената на статусот и формирањето нови творби долж јужната граница, и дека утрешниот референдум во Курдската регионална управа во северен Ирак во тој контекст ќе биде нелегален, јавува Anadolu Agency (AA).
„За сите можни последици од овој референдум одговорна е исклучиво Курдската регионална управа, која сама ја донесе оваа одлука без да се консултира со народот и за инает на противењето на сите држави во светот и на Обединетите нации“, порача Јилдирим во обраќањето на шестиот редовен Конгрес на владејачката турска Партија за правда и развој (AK Parti) во Мамак, Анкара.
Истакнувајќи дека спорниот референдум нема да реши ниту еден постоечки проблем во Ирак и во регионот, турскиот премиер Јилдирим рече дека така само повеќе ќе се продлабочи кризата во регионот, и дека цената за оваа грешка ќе ја платат луѓето кои живеат таму.
Tој исто така нагласи дека оние кои се одговорни за ова мора да одговараат, прво на својот народ, а потоа и на целата меѓународна заедница, која е против референдумот и дестабилизацијата на регионот.
„Нека знаат сите дека Турција и понатаму ќе продолжи да пружа рака за пријателство на народите во северниот дел на Ирак, кои веќе долго време страдаат поради тероризмот на ДЕАШ и на ПКК, како и поради кризата на власта во тој регион. Без оглед на крајниот исход и последиците од тој референдум, одговорност за тоа нема да бараме од Курдите, Арапите и Туркмените коишто живеат таму, туку исклучиво од оние кои се устрајни во таа погрешна одлука“, порача Јилдирим.
Toj на крајот рече дека Турција била и ќе остане своевиден остров на стабилноста и на правдата во регионот, и дека е способна да се спротивстави на сите предизвици и провокации.
Претседателот на Курдската регионална управа во северен Ирак, Месуд Барзани, на 7 јуни распиша референдум за независност на тој регион и го најави за утре, 25 септември. Во меѓувреме, Владата, Парламентот и Уставниот суд на Ирак забранија одржување на тој референдум, а за неприфатлив го оценија и соседна Турција и Иран, како и целата меѓународна заедница, со исклучок на Израел.
