Ekip
19 Мај 2021•Ажурирај: 20 Мај 2021
ОВИЕДО
Вакцинирањето на пациенти со коронавирус кои примиле вакцина на „АстраЗенека“ со вакцина на „Фајзер“ е безбедно и ефикасно, покажуваат првичните резултати од шпанска студија објавена вчера, пренесува Агенција Анадолија (АА).
Малото клиничко испитување предводено од шпанскиот Здравствен институт „Карлос III“ откри дека мешањето на вакцините може да обезбеди поголема заштита од вирусот.
Неутрализирачките антитела кај луѓето кои втората доза ја примиле од вакцината на „Фајзер“ се зголемиле за седумпати во споредба со оние кои примиле само една доза на вакцината на „АстраЗенека“.
„Тоа е поголемо зголемување на антителата од претходните студии во кои се давани две дози на „АстраЗенека““, вели Институтот за јавно здравје.
Несаканите ефекти биле исто така релативно благи кај оние лица кои втората доза ја примиле од вакцината на „Фајзер“. На ниеден не му бил потребен сериозен медицински третман, но 44 отсто пријавиле главоболка, 25 отсто се пожалиле на морници по телото и кај 2,5 отсто се појавила треска.
Клиничкото испитување опфатило 673 учесници кои првата доза ја примиле од вакцината на „АстраЗенека“. Контролната група се состоела од 232 лица кои не примиле втора доза на вакцина, додека на останатите 441 им била дадена доза од вакцината на „Фајзер“.
Шпанија брзо ја следеше студијата откако им даде од вакцината на „АстраЗенека“ на околу 2 милиони есенцијални работници помлади од 60 години. Потоа, кога беше откриена потенцијална поврзаност помеѓу вакцината и создавањето тромбови во крвта, земјата ја смени политиката за аплицирање на „АстраЗенека“ на оние постари од 60 години.
„Денешните резултати даваат поддршка за вакцинирање на луѓето кои првата доза ја примиле од вакцината на „АстраЗенека“ со „Фајзер“, но конечната одлука не лежи кај истражувачите“, истакна Хесус Антонио Фриас од Здравствениот институт „Карлос III“.
Шпанските здравствени власти подоцна ќе разговараат за тоа што да прават во врска со есенцијалните работници кои остануваат во вакцинациска неизвесност.
Даниел Лопез Акуна, поранешен директор на Светската здравствена организација (СЗО), вели дека мала студија, со значителни ограничувања, не претставува солидна основа за донесување одлуки за јавното здравство.
„Студијата не се осврнува на луѓето кои втората доза ја примиле од „АстраЗенека“ или „Модерна“… и не може да ги открие несаканите ефекти со помала честота“, напиша тој на Твитер.
„Комисијата за јавно здравје треба да ги следи препораките на СЗО и на Европската агенција за лекови и да ја одобри втората доза на „АстраЗенека“ кај лицата помлади од 60 години.“
