ЕРУСАЛИМ/АЛ-КУДС (АА) - На Блискиот Исток, но и во некои медитерански земји, колачот од сусам, попознат како баразек, е омилен деликатес во тоа поднебје и пошироко, јавува Анадолу.

Овој уникатен деликатес е многу популарен меѓу Палестинците, особено во Ал-Кудс (Ерусалим). Палестинските пекари во Ал-Кудс обично доаѓаат на работа в зори за да го подготват популарниот десерт кој многумина го нарекуваат баразек колаче.

Овој сладок деликатес одамна стана дел од историското и културното наследство на Ал-Кудс, а особено е омилен за време на месецот на муслиманскиот пост, Рамазан.

Баразек е само еден од многуте традиционални палестински десерти, и лесно е да се најдат тезги на кои се продава на улиците на Ал-Кудс.

Според некои традиции, баразекот потекнува од подрачјето на денешна Сирија. Главната состојка на ова колаче е сусамот, а често содржи и парчиња ф'стаци. Се верува дека настанал за време на османлиското владеење во главниот град на Сирија, Дамаск.

Меѓутоа, денес е толку популарен што може да се најде во повеќето слаткарници низ регионот на Левант (Либан, Јордан, Палестина и Сирија) но и пошироко.

Се смета за еден од најпознатите десерти на тоа подрачје и има многу варијанти. Колачето се подготвува од брашно, путер, шеќер и сусам, а некои користат и јајца, млеко, ф'стаци, мед, квасец и ванила, како и прочистен путер (самнех) наместо обичен путер. Има сладок, путерест и јаткаст вкус, и крцкава и кревка текстура.

- Подготовка -

Постојат неколку начини на подготвување, а овој не вклучува млеко, туку жолчки од јајце. Рачно се меша 250 грама брашно со 150 грама путер, ладен и исечен на парчиња. Да се измеси додека не добие песоклива текстура, потоа се додава шеќер во прав, две жолчки и екстракт од ванила. Тестото се обликува, се завиткува во фолија и се остава во фрижидер да отстои. Ова тесто е многу слично на тестото за француско пециво.

По неколку часа тестото се вади од фрижидер и се прават пелети од околу петнаесет грама. Пелетите се валкаат на чинија со сусам и се ставаат во плех од рерна, која мора да се загрее на 200 степени. Плехот се става во рерна и кога ќе почне да мириса, односно кога рабовите ќе се заруменат (по 10 минути) се вади и се префрла во плех со решетка за да се излади и стврдне.