Јапонскиот производител на чипови Рапидус ја отвора фабриката за полупроводници во април следната година

ТОКИО (АА) - Фабриката за полупроводници која се гради на северниот јапонски остров Хокаидо ќе започне со работа во април 2025 година, објави денес производителот на чипови Рапидус, пренесува Анадолу.

Јапонската компанија ја гради фабриката поради недостигот на полупроводници кој поттикна големи инвестиции во чипови од компании во секторите од автомобилската индустрија до паметните телефони и конзолите за видеоигри.

Кен Саито, јапонскиот министер за економија, трговија и индустрија, ја посети фабриката за производство на полупроводници, каде што од извршниот директор на Рапидус, Ацујоши Коике, е известен дека досега се завршени 30 отсто од тест-производните линии.

Саито истакна дека Министерството ќе стори сѐ што е во негова моќ да обезбеди успех на Рапидус во оваа фискална година.

Компанијата планира да произведува двонанометарски чипови во фабриката во Хокаидо, предвидувајќи буџет од 5 билиони јапонски јени (32 милијарди долари), и за истражување и развој.

Конзорциумот Рапидус, основан во август 2022 година, добива фондови од јапонската Влада и се состои од осум јапонски производители, вклучувајќи ги и Тојота и Сони.