Реакции за објавувањето на карикатурата на божјиот пратеник Мухамед од косовскиот амбасадор во Франција

ПРИШТИНА (АА) - Објавувањето навредливи карикатури на божјиот пратеник Мухамед на социјалните мрежи од страна на амбасадорот на Косово во Франција, Ќендрим Гаши, предизвика низа реакции во Косово. Таквото дејствување на амбасадорот Гаши го критикуваа и некои политички претставници, но и Претседателството на Исламската заедница на Косово, пренесува Агенција Анадолија (АА).

Претседателството на Исламската заедница на Косово го смета за неприфатливо и казниво дејствувањето на косовскиот амбасадор во Франција, затоа што на тој начин се зголемува нетрпеливоста, омразата и меѓучовечката недоверба. Во соопштението за медиумите, Исламската заедница нагласува дека албанскиот народ негува толеранција, разбирање, соживот и меѓурелигиска хармонија и таквиот пример треба да го следи и амбасадорот Гаши, а не да прави спротивно и со своите постапки да придонесе за верска нетрпеливост и омраза.

„Од Министерството за надворешни работи бараме да се огради од дејствувањето на амбасадорот Гаши, бидејќи сметаме дека со своето дејствување ги нападна вредностите и принципите на кои нашиот народ со векови се подигаше и негуваше хармонија и соживот меѓу религиите“, пишува во соопштението на Исламската заедница.

Исламската заедница на Косово, исто така, го осудува кривичното дело кон францускиот учител и рече дека е потребно истовремено да се ангажираат за нивната вера да не се користи за омраза и нетпреливост.

Реагираше и пратеничката на Движењето „Самоопределба“, Љабиноте Деми-Муртезај, која наведе дека чинот на исмејување на ликот на божјиот пратеник Мухамед е неприфатлив и е во потполна спротивност со вредностите што ги негува албанскиот народ.

„Оваа акција е скандал и Министерството за надворешни работи мора да преземе мерки за отстранување на Гаши од функцијата“, напиша Деми-Муртезаj на својот профил на Фејсбук. Пратеничката додаде дека е потребна конкретна акција за казнување за да се спречи кое било друго можно дело од овој вид.

И поранешниот пратеник Гезим Кељменди на социјалните мрежи напиша дека амбасадорот Гаши извршил низок и неморален чин.

„Косовскиот амбасадор во Франција, Ќендрим Гаши, би требало да знае дека го плаќа народот на Косово, а овој негов чин е многу низок и неморален“, изјави Кељменди.

Политичкиот аналитичар Неџмедин Спахиу изјави дека објавувањето на карикатурата е кривично дело според Кривичниот законик на Косово, што се казнува со затвор од 1 до 8 години.

„Со објавување карикатури со потсмев на пратеникот Мухамед, амбасадорот на Косово во Франција стори кривично дело казниво со затвор од 1 до 8 години според член 141, точка 3, од Кривичниот законик. Но, се поставува прашањето, дали Косово има обвинител? Оваа акција ја доведува и француската Влада во неволја, бидејќи тоа е кривично дело според францускиот закон“, напиша Спахиу на својот фејсбук-профил.

Францускиот амбасадор објави карикатура на божјиот пратеник Мухамед неколку дена по убиството на францускиот учител Самеул Патиа, кој беше убиен откако на учениците во училницата им ги покажал карикатурите. На 16 октомври, пред неговото училиште на периферијата на Париз, наставникот бил обезглавен од 18-годишник, кој подоцна бил убиен од полицијата.

Одредбите на исламот забрануваат каков било опис на ликот на божјиот пратеник Мухамед, сметајќи го за богохулење.