Admir Fazlagic
01 Јули 2017•Ажурирај: 02 Јули 2017
СКОПЈЕ (АА) - Претседателот на Република Македонија, Ѓорге Иванов на „Дубровник форум 2017“, што се одржува на тема „Јадранско-медитеранска соработка и безбедноста на Југоисточна Европа“, имаше свое обраќање во пое порача дека Европската унија (ЕУ) треба да го забрза интегративниот процес како витален елемент и дел од нејзината долгорочна стратегија за безбедност, јавува Anadolu Agency (AA).
„Балканот секогаш бил крстосница на Европа, а стабилни земји значат и подобра заштита на нејзините југоисточни граници", рече Иванов.
Претседателот Иванов, како што информира неговиот Кабинет, посочи дека најголемата закана за европската безбедност допрва доаѓа и итно е потребно да ѝ се посвети внимание, посочувајќи на илјадниците странски борци од балканските земји кои учествуваат во борбите на Блискиот Исток.
„ЕУ и НАТО мора да испланираат превентивни мерки против повратниците насочени не само кон нивните земји членки, туку и кон неинтегрираниот дел од Балканот", истакна претседателот Иванов.
Според него, интеграцијата на Балканот како целина не е само важна, туку е неопходна за долгорочен мир, стабилност и безбедност во регионот.
„Интеграцијата на балканските земји во Европската унија е најважната алатка за превенирање од религиозен екстремизам", рече Иванов.
Според неговите зборови, со тоа би се гарантирале надеж и напредок во регионот, кој веќе покажува знаци на разочарување и очај. „Европскиот сон треба да стане реалност за сите и тоа што е можно побргу", истакна тој.
Тој порача дека неинтегрираните земји од Балканот претставуваат безбедносен јаз во еден многу ранлив дел на Европа.
„Балканот како регион веќе има сопствени предизвици кои многу лесно може да предизвикаат нестабилност дури и без надворешно влијание: етничка и религиозна разноликост, историски судири, неодамнешни конфликти, невработеност, сиромаштија, корупција и организиран криминал. Сето ова, во комбинација со постојано присутниот национализам, етноцентризам, ксенофобија, а од неодамна и исламофобија, покажува дека Балканот ги има сите потребни состојки, кои терористичките групи може потенцијално да ги искористат за да ја подријат Европа посредно и од внатре", потенцираше македонскиот претседател Иванов во обраќањето на „ Дубровник форумот“.
Тој рече дека регионот, кој се соочува со предизвици кои од своја страна може да водат кон нестабилност и нефункционални држави, може многу лесно да стане прибежиште за терористи, база за понатамошни операции, транзитни кампови за обука, регрутирање, индоктринација и инфилтрирање на европско тло.
Меѓу другото, претседателот апелираше на потребата од долгорочни регионални политики за безбедност, како прв чекор кон создавање на стабилна и безбедна средина.
Претседателот Иванов вчера учествуваше на Самитот на шефови на држави и влади на земјите - учеснички во Процесот за соработка во Југоисточна Европа и оствари билатерална средба со претседателот на Хрватска, Колинда Грабар Китаровиќ.
