БЕРЛИН (АА) - Германскиот канцелар Фридрих Мерц го повика Иран да започне сериозни преговори за запирање на неговата нуклеарна програма, предупредувајќи дека потенцијалот за воена ескалација на Блискиот Исток е голем, јавува Анадолу.

Говорејќи за новинарите во Доха, Катар, Мерц рече дека неодамнешните случувања во врска со Иран се меѓу главните прашања што планира да ги разгледа за време на турнејата низ Персискиот Залив, во услови на предупредувања од САД за можна воена интервенција.

„Во сите мои разговори вчера (во Саудиска Арабија) и денес овде (во Катар) беше изразена голема загриженост за натамошна ескалација на конфликтот со Иран“, рече лидерот на конзервативците.

„Исто така, би сакал да ја искористам оваа можност уште еднаш да го повикам иранското раководство да влезе во сериозни преговори, да ја прекине агресијата, да ја прекине нуклеарната програма, како што е договорено на меѓународно ниво“, нагласи тој.

Мерц оцени дека би било позитивно доколку вакви разговори со Иран може да се остварат наредните денови со учество на претставници на САД.

„Во секој случај, сакам да направам сè што можам за да придонесам за деескалација“, рече тој, додавајќи дека Берлин е подготвен да соработува со регионалните партнери за да обезбеди стабилност.