АНКАРА (АА) – Началникот на Генералштабот на Турција, генерал Селчук Бајрактароглу, заедно со други високи воени команданти денес извршија увид на местото каде што синоќа се урна авионот што ја превезуваше либиската воена делегација, при што загинаа началникот на Генералштабот на либиската Армија, генерал Мохамед Али ал-Хадад, уште четворица членови на неговата делегација и тројца членови на екипажот, јавува Анадолу.

„Началникот на Генералштабот, генерал Селчук Бајрактароглу, заедно со командантите на силите, изврши увид на местото на несреќата“, се вели во соопштението на Генералштабот на турската платформа за социјални медиуми „NSosyal“.

Во соопштението се наведува дека генерал Бајрактароглу го посетил и мобилниот координациски центар што работи на терен, каде што добил информации од гувернерот на Анкара, Васип Шахин, како и од претставници на Дирекцијата за управување со катастрофи и вонредни состојби (АФАД).

Објавата содржеше и фотографии од увидот на терен.

Претходно, турскиот министер за внатрешни работи Али Јерликаја соопшти дека остатоците од приватниот авион од типот „Фалкон 50“, кој полетал од аеродромот Есенбога во Анкара кон Триполи, главниот град на Либија, биле пронајдени од жандармериските екипи на околу два километри јужно од селото Кесикавак, во округот Хајмана.

Тој додаде дека црната кутија и уредот за снимање на разговорите во пилотската кабина се пронајдени и дека веќе е започната постапката за нивно испитување со цел да се утврдат причините за авионската несреќа.