СКОПЈЕ (АА) – Собранието на Северна Македонија денес ги избра Мухамет Хоџа за министер за животна средина и просторно планирање и Беким Сали за министер за европски прашања, јавува Анадолу.

Двајцата новоназначени министри положија заклетва веднаш по гласањето на 75-тата пленарна седница.

Премиерот Христијан Мицкоски нагласи дека назначувањата се прават за да се обезбеди целосно функционирање и континуитет во работата на Владата, особено во клучните ресори. Тој оцени дека Хоџа има долгогодишно искуство во администрацијата и е добро ја познава меѓуинституционалната соработка.

За Беким Сали, кој исто така ќе биде и вицепремиер, Мицкоски го нагласи неговото претходно искуство како министер и неговото ангажирање во законодавната власт.

Тој додаде дека Министерството за европски прашања бара висока координација меѓу институциите и почитување на обврските што произлегуваат од националните и европските документи. Од новите министри се очекува професионална работа и почитување на Уставот и законите, додаде Мицкоски.

Назначувањата следеа по разрешувањето на Орхан Муртезани од функцијата министер за европски прашања, додека во дебатата имаше критики од опозицијата за, како што беше наведено, лошите резултати во процесот на европска интеграција и недостатокот на реформи.

Изборот на новите членови на Владата дојде и по локалните избори одржани во октомври откако Изет Меџити стапи на градоначалничката функција во Општина Чаир, кој ги извршуваше функциите прв вицепремиер и министер за животна средина и просторно планирање.

Мицкоски нагласи дека приоритет на Владата останува стабилното функционирање на институциите, спроведувањето на реформите и подобрувањето на квалитетот на животот на граѓаните, барајќи отчетност и транспарентност од секој член на кабинетот.