СКОПЈЕ (АА) – Стотици демонстранти се собраа вчера на „Јунион Сквер“ во Њујорк, барајќи од САД да преземат конкретни чекори за обезбедување итна и неограничена хуманитарна помош за Газа, јавува Анадолу.

Демонстрантите извикуваа слогани и носеа транспаренти со пораки за солидарност со палестинскиот народ, нагласувајќи ја итноста на интервенцијата поради тешката хуманитарна состојба предизвикана од конфликтот.

Тие држеа транспаренти на кои пишуваше „Престанете да ја изгладнувате Газа!“, „Нахранете ги бебињата од Газа“ и „Отворете ја границата, прекинете ја блокадата“.

Протестите беа одржани и во други градови, вклучувајќи го главниот град Вашингтон, Чикаго и Сан Франциско, за да се побара прекин на израелската опсада на Појасот Газа, бидејќи масовното гладување се искачи на невидени нивоа.

И покрај меѓународните повици за прекин на огнот, израелската Армија уби повеќе од 59.000 Палестинци во смртоносната офанзива во Појасот Газа од октомври 2023 година.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата поради своите воени дејства во енклавата.