Речникот Кембриџ го избра зборот „парасоцијален“ за збор на годината за 2025

ИСТАНБУЛ (АА) – Речникот Кембриџ го прогласи зборот „парасоцијален“ за збор на годината за 2025, термин што ја опишува врската што луѓето ја чувствуваат кон некого кого всушност не го познаваат, јавува Анадолу.

Овој избор го става во фокус растечкиот интерес за еднострани „парасоцијални“ односи што луѓето ги создаваат со славни личности, инфлуенсери, но сè почесто и со вештачка интелигенција, како што се чет-ботови.

Терминот првпат го дефинирале социолозите Доналд Хортон и Ричард Вол, кои забележале дека гледачите на телевизија формираат „парасоцијални“ односи со личности од екранот, слични на оние што ги имаат со пријателите и членовите на семејството.

Во соопштението објавено вчера, речникот Кембриџ го наведе примерот со свршувачката на поп-ѕвездата Тејлор Свифт и американскиот фудбалер Тревис Келси, истакнувајќи дека многу фанови чувствувале силна поврзаност со нив, иако никогаш не ги сретнале.

„Појавата на парасоцијални односи со ботови на вештачката интелигенција покажа дека луѓето се однесуваат кон Чет ЏПТ како кон доверлив соговорник, пријател, па дури и романтичен партнер“, соопшти речникот Кембриџ.

Во него се забележува дека порастот на парасоцијалните врски го редефинира восхитувањето, славните личности, а со вештачката интелигенција и начинот на кој обичните луѓе комуницираат онлајн.

„Милиони луѓе се вклучени во парасоцијални односи. Многумина се едноставно фасцинирани од нивниот подем. Податоците го потврдуваат тоа, со значителен раст на пребарувањата за зборот ‘парасоцијален’ на веб-страницата на речникот Кембриџ“, се вели во соопштението.