СКОПЈЕ (АА) – Денес во Скопје продолжи рочиштето за пожарот во дискотеката во Кочани, во кој загинаа 63 лица, а над 200 беа повредени, кое се водеше под засилени безбедносни мерки, со присуство на обвинетите, роднините на загинатите и повредените и новинарите, јавува Анадолу.

Одбраната на дел од обвинетите на денешното рочиште изнесе забелешки за работата на Обвинителството и критики за правната конструкција на обвинението и начинот на кој, според адвокатите, се пласираат неточни информации за институционалната одговорност и правниот статус на објектот.

Судењето продолжува на 23 декември со воведен збор на одбраната на обвинетиот сопственик на агенцијата за обезбедување, Александар Нацев.

Денес одбраната на обвинетите вработени во Министерството за економија истакна дека тие вршеле само службена проверка на документацијата за лиценци, без можност да предизвикаат или да придонесат во пожарот во дискотеката што се случи на 16 март 2025 година. Во своите воведни говори пред судот тие денес укажаа дека „ниту им било обврска ниту надлежност по закон да вршат проверка на какви било услови“ и дека немале ниту можност да вршат проверка дали кој било документ доставен до нив по закон е точен или неточен. Нивната работа, според нив, била од управна постапка, без право на увид во објектот – административна, а не инспекциска и дека работат со документација што доаѓа заверена и потпишана со одговорност од други институции.

Одбраната на пазарните инспектори, пак, од своја страна, остро ја критикуваше правната конструкција на обвинението и начинот на кој, како што е наведено, во јавноста се пласираат неточни информации за институционалната одговорност и правниот статус на објектот во кој загинаа повеќе лица.

Претходно, покрај обвинителството, воведен збор даде и одбраната на првообвинетиот сопственикот на дискотеката Дејан Јованов, дел од обезбедувањето и сопственикот на објектот. Дел од обвинетите во воведните говори ја оспорија основаноста на обвинението. Воведен збор дадоа и поранешните директори на ДЗС, министри за економија, како и градежни инспектори.

Обвинителството, застапувано од тим од 15 јавни обвинители, најави дека доказите ќе покажат дека дискотеката била смртоносна стапица уште од почетокот - резултат на систематска негрижа и институционални пропусти.

На обвинителната клупа се 37 лица: управители, сопственици, поранешни градоначалници, инспектори, персонал на обезбедувањето и државни службеници.