ТИРАНА (AA) – Премиерот на Албанија, Еди Рама, изјави дека неговата земја ќе го прогласи Иран за држава спонзор на тероризмот, а Иранската револуционерна гарда (ИРГК) и Хезболах за терористички организации, јавува Анадолу.

На прес-конференција од седиштето на Владата во Тирана, Рама зборуваше за повеќе прашања, вклучувајќи ги и најновите случувања на Блискиот Исток и мерките што ќе ги преземе Албанија.

Премиерот нагласи дека Парламентот на Албанија ќе биде повикан да гласа резолуција со која Иран ќе биде прогласен за држава спонзор на тероризмот.

„Следната недела Парламентот на Албанија ќе биде повикан да гласа резолуција за прогласување на Хомеинистичката Република Иран – јас усно не можам да ја наречам исламска, бидејќи таа република нема никаква врска со исламот според тоа што јас го знам и ценам во исламот – за држава спонзор на тероризмот. Заедно со тоа, за терористички организации ќе бидат прогласени и Иранската револуционерна гарда и Хезболах, и двете“, рече Рама.

Тој нагласи дека во овие чекори Албанија не е пионер, бидејќи, според него, „и претходно имало партнери, сојузници и пријатели кои го направиле тоа, но дојде време и ние да го направиме истото тоа“.

„Од друга страна, кризата (на Блискиот Исток) се чувствува во целиот свет, а се чувствува и овде, како резултат на зголемувањето на цената на нафтата“, истакна Рама.

И министерот за Европа и надворешни работи на Албанија, Ферит Хоџа, пред неколку дена потврди дека Тирана наскоро ќе донесе официјална одлука со која Иранската револуционерна гарда ќе биде прогласена за терористичка организација.