БРИСЕЛ (АА) – Група демонстранти во шпанската престолнина Мадрид формираа синџир како знак на протест поради нападите на САД и Израел врз Иран и одговорот на Техеран, јавува Анадолу.

Протестите беа организирани од граѓанското Здружение против вооружување и милитаризација, а учесниците повикаа на крај на милитаризацијата и војната.

Демонстрантите носеа транспаренти и извикуваа пароли како „Не за вооружување, не за војна, не за НАТО“.

Меѓу присутните беше и водачот на Подемос, Јоне Белара.

Во меѓувреме, со манифестот потпишан од 143 организации од граѓанското општество и речиси 200 личности од уметничкиот и културниот сектор се повика на национални демонстрации низ Шпанија на 14 март, во знак на протест поради нападите на САД и Израел врз Иран.

Манифестот, насловен „Мора да ја запреме војната на Блискиот Исток“, доби поддршка и од членови на владејачката коалиција во Шпанија, вклучително и од Шпанската социјалистичка работничка партија (ПСОЕ) и алијансата Сумар.

Потписниците ги повикаа сите демократи да ја осудат агресијата, да го бранат меѓународното право и да работат за праведен и траен мир на Блискиот Исток, додавајќи дека таквиот мир мора да вклучува и крај на, како што наведуваат, геноцидот во Газа.