ИСТАНБУЛ (АА) – Израелската армија гаѓаше инфраструктура поврзана со иранската Влада во координирани воздушни напади врз главниот град Техеран, како и врз градовите Шираз и Ахваз во изминатите 24 часа, соопшти израелската армија денес на американската компанија за социјални медиуми Х, јавува Анадолу.

Израелските воздухопловни сили извршија неколку истовремени напади врз трите града под водство на военото разузнавање, гаѓајќи ја, како што ја опиша војската, инфраструктурата што му припаѓа на „иранскиот терористички режим“.

Израелската армија тврди дека во Шираз, во јужниот дел на Централен Иран, авионите гаѓале подземен објект што се користел за производство и складирање балистички ракети наменети за лансирање кон Израел.

Во Техеран, израелските сили гаѓаа локации и централна база на иранскиот систем за противвоздушна одбрана.

Дополнително, цел беа и објекти за производство на различно оружје, системи за противвоздушна одбрана и компоненти за балистички ракети, додаде армијата.

Истовремено, Израел тврди дека во Ахваз, во Југозападен Иран, неговите напади биле насочени кон штабовите на неколку ирански владини тела, вклучително и командни центри на копнените сили на Исламската револуционерна гарда и централната команда на внатрешните безбедносни сили одговорни за координација со Револуционерната гарда.

Израелската армија соопшти дека била забележана активност на ирански персонал во штабовите што биле цел, додавајќи дека од тие локации дејствувале десетици членови за да ги унапредат и координираат, како што ги опиша, „терористичките операции“ против Израел и другите земји во регионот.

Извршените напади се дел од она што израелската армија го опиша како фаза насочена кон зголемување на оштетувањето на основните системи и темели на иранската Влада, соопшти израелската армија.