پەیوەندی تەلەفۆنی سیسی و پوتین

قاهیرە ــ AA

سەركۆماری میسر، عەبدولفەتاح سیسی دوایین پێشهاتەكانی رەوشی ناوچەی رۆژهەڵاتی ناوەڕاستی لەگەڵ سەرۆكی رووسیا، ڤلادیمیر پوتین تاوتوێ‌ كرد.

لە راگەیەنراوێكی سەرۆكایەتی كۆماری میسردا هاتووە، "عەبدولفەتاح سیسی و ڤلادیمیر پوتین پەیوەندییەكی تەلەفۆنییان ئەنجامدا".

بە پێی راگەیەنراوەكە لە پەیوەندییە تەلەفۆنییەكەدا، سەركۆماری میسر و سەرۆكی رووسیا ژمارەیەك بابەتیان تاوتوێ‌ كردووە لەوانە دوایین پێشهاتەكانی رەوشی رۆژهەڵاتی ناوەڕاست، لەگەڵ هەوڵە هاوبەشەكانی نێوان هەردوو وڵات كە بۆ دووبارە سەقامگیربوونەوەی ناوچەكە و گەیشتن بە چارەسەری سیاسی بۆ قەیرانەكانی ئێستا خستوویانەتەگەڕ.

لە راگەیەنراوەكەدا ئاماژە بەوەشدراوە كە هەر لە میانی پەیوەندییە تەلەفۆنییەكەدا، عەبدولفەتاح سیسی و ڤلادیمیر پوتین لە بارەی چۆنیەتی برەودان بە پەیوەندییەكانی نێوان هەردووڵات، هەروەها گرنگی بەردەوامی كاركردن لە پێناو كاراكردنی هاوكارییە هاوبەشەكانی نێوان رووسیا و میسر لە ژمارەیەك بواردا، گفتوگۆیان كردووە بەتایبەت لە هەردوو بوارەكانی سەربازی و بازرگانی.

وەك لە راگەیەنراوەكەدا خراوەتەڕوو لە میانی پەیوەندییە تەلەفۆنییەكەدا، سەرۆكی رووسیا ستایشی هەوڵەكانی میسری كردووە كە بە ئامانجی بەدیهێنانی ئاشتەوایی فەڵەستین خستوویەتەگەڕ و دووپاتی كردەوە كە رووسیا پشتیوانی لە حكوومەت و گەلی میسر دەكات بۆ بەرنگاربوونەوەی تیرۆر.