له‌ ئه‌مڕۆوه‌ ده‌رگای خۆكاندیدكردن بۆ رێكخه‌ری گشتی گۆڕان ده‌كرێته‌وه‌

هه‌ولێر-AA

كاردۆ محه‌مه‌د ده‌ڵێت كێشه‌كانی هه‌رێم پێویستییان به‌ دانیشتنی راشكاو هه‌یه‌ و ده‌بێت رێككه‌وتنی سیاسییان له‌سه‌ر بكرێت.

سه‌باره‌ت به‌ هه‌ڵبژاردنی رێكخه‌رێكی گشتی نوێ بۆ بزووتنه‌وه‌ی گۆڕان له‌دوای کۆچی دوایی نه‌وشیروان مسته‌فا هه‌ڵسوڕاوێكی بزووتنه‌وه‌كه‌ له‌ لێدوانێكدا بۆ ئاژانسی ئانادۆڵو باس له‌ رێوشوێنه‌كان ده‌كات و زانیاریی ده‌خاته‌ روو، له‌و باره‌یه‌وه‌ كاردۆ محه‌مه‌د رایده‌گه‌یه‌نێت "بزووتنه‌وه‌ی گۆڕان بۆ به‌ڕێوه‌بردنی كاره‌كانی ده‌ستووری هه‌یه‌، له‌و ده‌ستووره‌ ئه‌وه‌ی په‌یوه‌نده‌ به‌ رێكخه‌ری گشتییه‌وه‌ هه‌یه‌ یان خانه‌ی راپه‌ڕاندن هه‌ڵبژاردنی بۆ ده‌كرێت و به‌روونی باسكراوه‌، هه‌ر ئه‌ندام و هه‌ڵسوڕاوێكی دیاری ئێمه‌ له‌ جڤاتی نیشتمانی یان كه‌سایه‌تییه‌كی دیار بێت ده‌توانێت خۆی بۆ پۆستی رێكخه‌ری گشتی كاندید بكات و جڤاتی نیشتمانی به‌ زۆرینه‌ی ده‌نگ ده‌نگی له‌سه‌ر ده‌دات و هه‌ڵیده‌بژێرێت بۆ رێكخه‌ری گشتی".
گوتیشی: "جڤاتی نیشتمانی 53 كه‌سن له‌گه‌ڵ باژێروانه‌كان و به‌رپرسانی ژووره‌كان ئه‌مانه‌ بۆیان هه‌یه‌ ده‌نگ بده‌ن، ئه‌و كه‌سه‌شی ده‌بێته‌ رێكخه‌ری گشتی ده‌بێت له‌و ژماره‌یه‌ 50+1 ی كۆی ده‌نگه‌كان به‌ده‌ست بهێنێت ئینجا سه‌رده‌كه‌وێت و ده‌بێته‌ رێكخه‌ری گشتی، ئه‌و كه‌سه‌شی هه‌ڵده‌بژێردرێت ده‌بێت هه‌ڵسوڕاوێكی دیاری گۆڕان بێت یان باژێروران یان به‌رپرسی ژووره‌كان بێت، مه‌رجی دیكه‌ش هه‌یه‌ كه‌ په‌یوه‌ندیی به‌ رووی یاساییه‌وه‌ هه‌یه‌ له‌وانه‌ ئه‌ندامی گۆڕان بێت و هه‌ڵسوراوی دیار بێت، له‌رووی یاساییشه‌وه‌ كێشه‌ی نه‌بێت".
سه‌باره‌ت به‌كاتی دابه‌شكردنی فۆرمی خۆكاندید كردن بۆ ئه‌و پۆسته‌ ناوبراو رایگه‌یاند "بڕیاره‌ له‌ئه‌مڕۆ پێنجشه‌ممه‌وه‌ فۆرمی خۆكاندیدكردن دابه‌ش بكرێت و له‌ 25ی ئه‌م مانگه‌شدا هه‌ڵبژاردن به‌ڕێوه‌ده‌چێت".

نه‌وشیروان مسته‌فا ئه‌مین له‌ساڵی 1944 له‌دایك بووه‌، سیاسه‌تمه‌دارێكی دیاری كورد بوو، ئه‌و پارتی دیموكراتی كوردستانی وه‌كو یه‌كه‌م وێستگه‌ی خه‌باتی سیاسی و چه‌كداریی خۆی هه‌ڵبژارد، له‌ دامه‌زرێنه‌رانی یه‌كێتی نیشتمانی كوردستانه‌ كه‌ له‌ پارتی جیابوویه‌وه‌ له‌ ساڵی 1975 و ماوه‌یه‌كی زۆر له‌نێو یه‌كێتییدا پۆستی جێگری سكرتێری گشتی هه‌بوو، له‌ كۆتاییه‌كانی ساڵی 2006 دوای داواكردنی ئه‌نجامدانی ریفۆرم له‌نێو یه‌كێتی هه‌ستی به‌شكست هێنانی هه‌وڵه‌كانی كرد و له‌و حزبه‌ هاته‌ ده‌ره‌وه‌.

نه‌وشیروان مسته‌فا ئه‌مین له‌ساڵی 2009 بزووتنه‌وه‌ی گۆڕانی وه‌كو بزووتنه‌وه‌یه‌كی ئۆپۆزسیۆن دامه‌زراند كه‌ به‌زۆرینه‌ له‌ گه‌نجان پێكدێت، له‌ یه‌كه‌م به‌شداریی هه‌ڵبژاردنه‌كانی په‌رله‌ماندا 25 كورسیی له‌كۆی 100 كورسی به‌ده‌ستهێنا، به‌هۆی نه‌خۆشییه‌كی قورسه‌وه‌ نه‌وشیروان موسته‌فا چه‌ندین جار سه‌ردانی ده‌ره‌وه‌ی هه‌رێمی كوردستانی بۆ چاره‌سه‌ر كردووه‌ و دواتر له‌ 19ی ئایاری ئه‌مساڵ كۆچی دوایی كرد.

ده‌باره‌ی ئه‌و كه‌سانه‌شی كه‌ خۆیان كاندید ده‌كه‌ن بۆ پۆستی رێكخه‌ری گشتی بزووتنه‌وه‌ی گۆڕان و ئه‌و كه‌سانه‌شی كه‌ زۆرترین قسه‌یان له‌سه‌ر ده‌كرێت بۆ پۆستی رێكخه‌ری گشتی و جێگره‌وه‌ی نه‌وشیروان مسته‌فا، كاردۆ محه‌مه‌د له‌و لێدوانه‌یدا بۆ ئاژانسی ئانادۆڵو گوتی "تێڕوانینیك هه‌یه‌ له‌رووی نه‌ریته‌وه‌ كه‌ كێ ده‌توانێت ئه‌و سه‌ركردایه‌تییه‌ بكات ئه‌وه‌ی تا ئێستا دیاره‌ دوو كه‌س خۆیان ده‌پاڵێون بۆ ئه‌و پۆسته‌".

سه‌باره‌ت به‌وه‌ی ئایا ئه‌وانه‌ی خۆیان كاندید ده‌كه‌ن ده‌توانن به‌رده‌وامیی به‌ بزووتنه‌وه‌ی گۆڕان وه‌كو ئه‌وه‌ی نه‌وشیروان مسته‌فا ده‌یویست بده‌ن، كاردۆ محه‌مه‌د رایده‌گه‌یه‌نێت "گۆڕان به‌له‌ده‌ستدانی كاك نه‌وشیروان خه‌ساره‌تێكی گه‌وره‌ی لێ كه‌وت، به‌ڵام به‌ پابه‌ندبوون به‌ رێباز و ئایدیا و كولتووره‌كه‌ی و به‌ كاركردن به‌فۆرمه‌لە ده‌توانرێت قه‌ره‌بووی ئه‌و بۆشاییه‌ بكه‌ین به‌تایبه‌ت به‌كاركردن به‌و ده‌ستووره‌ی بزووتنه‌وه‌ی گۆڕانی له‌سه‌ر دروست بووه‌، پێشموایه‌ سه‌ركردایه‌تی گۆڕان له‌و ئاسته‌دان بتوانن ئه‌و به‌رنامه‌یه‌ی كاك نه‌وشیروان و هاوڕێكانی دایانڕشت به‌رده‌وامیی پێبده‌ن".

له‌باره‌ی كوڕه‌كانی نه‌وشیروان مسته‌فاشه‌وه‌ ئه‌و به‌رپرسه‌ باڵایه‌ی گۆڕان ده‌ڵێت "ئه‌وان دووره‌په‌رێزنیین و به‌شێكن له‌ بزووتنه‌وه‌ی گۆڕان و كاریگه‌رییان هه‌یه‌، به‌ڵام گۆڕان ده‌بێت جیاواز له‌ حزبه‌كانی تر چۆن مۆدێڵیكی نوێی سیاسی و حزبایه‌تییان هێنایه‌ كایه‌وه‌ و نه‌ریتێكی نوێی هێنایه‌ نێو كاری حزبایه‌تی، به‌هه‌مان شێوه‌ كوڕه‌كانی كاك نه‌وشیروانیش نایانه‌وێت ئه‌و ئه‌زموونه‌ ته‌قلیدییه‌ی له‌ حزبه‌كانی دیكه‌ دووباره‌ بكه‌نه‌وه‌، به‌ڵام مانای ئه‌وه‌ نییه‌ وه‌كو هاوڕێیانی تر ده‌رفه‌تی به‌شداریی نێو جوڵانه‌وه‌كه‌یان نییه‌".

له‌كۆتایی قسه‌كانیدا كاردۆ محه‌مه‌د له‌ وه‌ڵامی پرسیارێكدا له‌باره‌ی دوایین هه‌وڵه‌كان بۆ چاره‌سه‌ركردنی بارودۆخی هه‌رێمی كوردستان كه‌ دوای داخستنی په‌رله‌مان و رێگریكردن له‌ سه‌رۆكی په‌رله‌مان بۆ هاتنه‌وه‌ بۆ هه‌ولێر و ناردنه‌وه‌ی وه‌زیره‌كانی گۆڕان و ئه‌و ناكۆكییه‌ قوڵه‌ی نزیك به‌ دوو ساڵه‌ هه‌یه‌، كاردۆ محه‌مه‌د تیشكی خسته‌ سه‌ر داواكارییه‌كه‌ی ئه‌مدواییه‌ی پارتی دیموکراتی کوردستان بۆ دانیشتن له‌گه‌ڵ گۆڕان، ده‌ڵێت "له‌ راستیدا چاره‌سه‌ركردنی كێشه‌ سیاسییه‌كانی كوردستان پێویستی به‌ گفتوگۆی راشكاوه‌، تا ئێستا گرفت و ئاسته‌نگی سه‌ره‌كیی ئاساییكردنه‌وه‌ی ره‌وشی په‌رله‌مانه‌ كه‌ پارتی دیموكراتی كوردستان په‌كی خستووه‌، ئێستا گرفتی دیكه‌ هاتوونه‌ته‌ كایه‌وه‌ كه‌ گرفتی یاسایی و سیاسیین و ده‌بێت له‌ دانیشتنی راشكاو ئه‌وانه‌ چاره‌سه‌ر بكرێن، گۆڕان زۆر داكۆكی له‌وه‌ ده‌كات كۆبوونه‌وه‌ له‌پێناو كۆبوونه‌وه‌ نه‌بێت، بۆ چاره‌سه‌ركردنی كێشه‌كانی هه‌رێم پێویستمان به‌ دانیشتنی سیاسی هه‌یه‌ هه‌روه‌ها هه‌م بیخه‌ینه‌ چوارچێوه‌ی یاساییشه‌وه‌".