نه‌سره‌ددین سندی: "ریفراندۆم له‌ هه‌موو ناوچه‌ كێشه‌ له‌سه‌ره‌كان ناكرێت"

هه‌ولێر - AA
نه‌سره‌ددین سه‌عید ده‌ڵێت به‌شێك له‌ ناوچه‌ كێشه‌ له‌سه‌ره‌كان به‌ ده‌ستی حه‌شدی شه‌عبی، سوپای عێراق، په‌كه‌كه‌، داعشه‌وه‌یه‌.
سه‌رۆكی ده‌سته‌ی گشتی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێمی كوردستان، نه‌سره‌ددین سه‌عید سندی له‌ لێدوانێكدا بۆ ئاژانسی ئانادۆڵو سه‌باره‌ت به‌ ئه‌نجامدانی پڕۆسه‌ی ریفراندۆم كه‌ بڕیاره‌ له‌ 25ی ئه‌یلوولی ئه‌مساڵدا له‌ هه‌رێمی كوردستان و ناوچه‌ كێشه‌ له‌سه‌ره‌كانیش به‌ڕێوه‌بچێت رایده‌گه‌یه‌نێت "به‌شداریكردنی خه‌ڵكی ناوچه‌ كێشه‌ له‌سه‌ره‌كان له‌ پڕۆسه‌ی ریفراندۆم له‌ لای ئێمه‌ هه‌نگاوێكی مێژوویی و گرنگه‌ بۆ پڕۆسه‌یه‌كی سیاسیی گرنگ كه‌ له‌ هه‌رێمی كوردستان بڕیاری لێوه‌دراوه‌، ئێمه‌ پێش نزیكه‌ی شه‌ش مانگ له‌مه‌وبه‌ر نووسراوی ره‌سمییمان ئاراسته‌ی ئه‌نجوومه‌نی وه‌زیرانی حكوومه‌تی هه‌رێم كردووه‌ كه‌ هه‌ر ریفراندۆمێك له‌ هه‌رێمی كوردستان ئه‌نجامبدرێت گرنگه‌ خه‌ڵكی ناوچه‌ كێشه‌ له‌سه‌ركانیش به‌شداریی تیادا بكات و له‌و ناوچانه‌ ئه‌نجامبدرێت".
له‌گه‌ڵ ئه‌وه‌شدا ده‌ڵێت "ئێستا هه‌موو ناوچه‌ كێشه‌ له‌سه‌ره‌كان به‌رقه‌رارنیین تا ریفراندۆمی تیادا ئه‌نجامبده‌ین، هه‌ندێك له‌ ناوچه‌ كێشه‌ له‌سه‌ره‌كان حه‌شدی شه‌عبییان تێدایه‌، هه‌ندێك ناوچه‌ له‌ژێر كۆنتڕۆڵی سوپای عێراقدان، به‌شێكی دیكه‌ی ئه‌و ناوچانه‌ له‌ژێر كۆنتڕۆڵی په‌كه‌كه‌دایه‌، هه‌روه‌ها چه‌ند شوێنێكیش هێشتا له‌ ده‌ستی داعشدایه‌ وه‌كو حه‌ویجه‌، بۆیه‌ ده‌بێت ئه‌و ناوچانه‌ ده‌ستنیشان بكرێت كه‌ به‌رقه‌رارن و بتوانیین ریفراندۆمی تێدا ئه‌نجامبده‌ین و دواتر له‌و شوێنانه‌ بیكه‌ین، بۆیه‌ ئه‌و ناوچه‌ كێشه‌ له‌سه‌رانه‌ی كه‌ ئارامن و ده‌توانیین تیادا به‌ سه‌ركه‌وتوویی پڕۆسه‌كه‌ی تیادا ئه‌نجامبده‌ین ئه‌نجامی ده‌ده‌ین".
ئه‌و به‌رپرسه‌ی حكوومه‌تی هه‌رێمی كوردستان باسی له‌وه‌شكرد كه‌ نزیكه‌ی دوو ملیۆن كه‌س له‌و شوێنانه‌ی كه‌ كێشه‌یان له‌سه‌ره‌، ده‌ژیین و ئه‌و ناوچانه‌شی كێشه‌ له‌سه‌رن نزیكه‌ی 50 له‌سه‌دی رووبه‌ری هه‌رێمی كوردستان پێكده‌هێنن، بۆیه‌ به‌شداریی خه‌ڵكی ئه‌و ناوچانه‌ له‌ ریفراندۆم بۆ هه‌رێمی كوردستان زۆر گرنگ ده‌بێت.
هه‌روه‌ها له‌ درێژه‌ی قسه‌كانیدا بۆ ئاژانسی ئانادۆڵو راشیگه‌یاند کە ئه‌وان پێشنیازی پرسیارێكی دیكه‌ بۆ لێژنه‌ی باڵای ریفراندۆم ده‌كه‌ن كه‌ تایبه‌ته‌ به‌ گه‌ڕاندنه‌وه‌ی ناوچه‌ كێشه‌ له‌سه‌ره‌كان بۆ سه‌ر هه‌رێمی كوردستان، نه‌سره‌ددین سندی گوتی: "ئێمه‌ به‌ باشی ده‌زانین و پێشنیازیش بۆ ئه‌نجوومه‌نی باڵای ریفراندۆم ده‌كه‌ین كه‌ له‌سه‌ر كارتی ده‌نگدان له‌سه‌ر ریفراندۆم بۆ خه‌ڵكی ناوچه‌ كێشه‌ له‌سه‌ره‌كان پرسیارێكی دیكه‌ش زیاد بكرێت ئه‌ویش ئه‌وه‌یه‌ كه‌ 'ئه‌وان پێیان باشه‌ ناوچه‌كانییان بگه‌ڕێته‌وه‌ بۆ سه‌ر هه‌رێمی كوردستان'، ئێمه‌ ئه‌م پێشنیازه‌ ده‌خه‌ینه‌ به‌رده‌ست لێژنه‌كه‌ هه‌رچی كاتێك له‌گه‌ڵیاندا كۆ ببینه‌وه‌".
نه‌سره‌ددین سه‌عید كه‌ ده‌سته‌كه‌ی چه‌ند كابینه‌یه‌كه‌ له‌ لایه‌ن حكوومه‌تی هه‌رێمی كوردستانه‌وه‌ دامه‌زراوه‌ و په‌یوه‌سته‌ به‌ ناوچه‌ كێشه‌ له‌سه‌ره‌كان له‌ درێژه‌ی قسه‌كانیدا له‌باره‌ی ئاگاداری حكوومه‌تی عێراق له‌ ئه‌نجامدانی ریفراندۆم له‌و ناوچانه‌ی كێشه‌ له‌سه‌رن گوتی: "ئێمه‌ وه‌كو ده‌سته‌ هیچ په‌یوه‌ندییه‌كمان له‌گه‌ڵ عێراق نییه‌، ئه‌نجوومه‌نی وه‌زیرانی هه‌رێمه‌ په‌یوه‌ندییان له‌گه‌ڵ به‌غدا هه‌یه‌، تا ئێستا هیچ شاندێكی هه‌رێمیش نه‌چووه‌ بۆ به‌غدا تا پێیان رابگه‌یه‌نن و دانوستانی له‌سه‌ر بكرێت، به‌ڵام به‌غداش له‌ رێگه‌ی راگه‌یاندنه‌كانه‌وه‌ ئاگاداره‌ كه‌ ریفراندۆم له‌و ناوچانه‌ی كێشه‌یان له‌سه‌ره‌ ئه‌نجامده‌درێت".
سه‌باره‌ت به‌ ئه‌گه‌ری روودانی كێشه‌ له‌و ناوچانه‌ی كێشه‌یان له‌سه‌ره‌، ناوبراو گوتی: "ئومێد ده‌كه‌ین هیچ كێشه‌یه‌ك دروست نه‌بێت، به‌ڵام هه‌ندێك هێز له‌و ناوچانه‌ هه‌ن دوور نییه‌ هه‌ندێك كێشه‌ دروست بكه‌ن".

ده‌رباره‌ی گه‌ڕانه‌وه‌ی ئه‌و ناوچانه‌شی كێشه‌یان له‌سه‌ره‌ بۆ سه‌ر هه‌رێمی كوردستان ئه‌و به‌رپرسه‌ باڵایه‌ی حكوومه‌تی هه‌رێمی كوردستان گوتیشی: "یه‌كێك له‌ كاره‌كان ده‌بێت بۆ گه‌ڕاندنه‌وه‌ی ناوچه‌ كێشه‌ له‌سه‌ره‌كان بۆ سه‌ر هه‌رێم ئه‌نجامدانی ریفراندۆمه‌".