سەرۆکی هەرێمی کوردستان پیرۆزبايی ساڵی نوێی کۆچی لە موسڵمانان دەکات

ھەولێر - AA

سەرۆکی ھەرێمی کوردستان، نێچیرڤان بارزانی بە بۆنەی سەری ساڵی نوێی کۆچی، پەیامێکی پیرۆزبایی ئاراستەی موسڵمانانی کوردستان و عێراق و جیھان کرد.

سەرۆکی ھەرێمی کوردستان، نێچیرڤان بارزانی لە پەیامەکەیدا ھیوای خواست کە سەری ساڵی نوێی کۆچی، ببێتە ساڵێکی پڕ بەرەکەت و خێر و خۆشی بۆ ھەموو موسڵمانان و مرۆڤایەتی بەگشتی.

دەقی پەیامەکەی سەرۆکی ھەرێمی کوردستان، نێچیرڤان بارزانی:

بە بۆنەی یەکی موحەڕڕەم و سەری ساڵی نوێی کۆچییەوە، پیرۆزبایی لە تەواوی موسڵمانانی کوردستان و عێراق و جیھان دەکەم. ھیوادارم ساڵی نوێی کۆچی، ساڵێکی پڕ بەرەکەت و خێر و خۆشی بێت بۆ ھەموو موسڵمانان و مرۆڤایەتی بەگشتی.

لە خوای مەزن داواکارم ساڵی نوێ کۆتاییی دەرد و بەڵا و مەینەتی و گرفتەکان لەگەڵ خۆیدا بھێنێت، بۆ کوردستان و عێراق و جیھان ساڵێکی پڕ ئاسوودەیی و ئارامی و خۆشبەختی بێت.

دووبارە پیرۆزبایی لە ھەموو لایەک دەکەم و ھەموو ساڵێک بە خۆشی.

نێچیرڤان بارزانی

سەرۆکی ھەرێمی کوردستان

٩ی ئابی ٢٠٢١