سه‌رۆكى هه‌رێمى كوردستان پێشوازی لە وه‌زيرى ده‌ره‌وه‌ى عێراق کرد

ھەولێر - AA

سەرۆکی ھەرێمی کوردستان، نێچیرڤان بارزانی پێشوازی لە وەزیری دەرەوەی عێراق، محەمەد عەلی ئەلحەکیم کرد.

بەپێی ئەو راگەیەندراوەی لە ماڵپەری فەرمی سەرۆکی ھەرێمی کوردستان بڵاوکراوەتەوە، نێچیرڤان بارزانی پێشوازی لە وەزیری دەرەوەی عێراق، محەمەد عەلی ئەلحەکیم کردووە.

لە راگەیەندراوەکەدا ئاماژە بەوە کراوە کە لە کۆبوونەوەکەدا سەرۆکی ھەرێمی کوردستان و وەزیری دەرەوەی عێراق جەختیان لەسەر ھەوڵدان بۆ چارەسەرکردنی کێشەکان و ئاساییبوونەوەی دۆخی عێراق و گەڕانەوەی ئارامی و سەقامگیری و راستەڕێبوونی پرۆسەی سیاسی لە وڵات کردەوەوە.

ھەر لەمیانی کۆبوونەوەکدا، ھەردوولا دوایین پێشھاتەکانی دۆخی عێراق، خۆپیشاندانەکانی بەغدا و پارێزگاکانی دیکەی وڵاتیان تاوتوێ کرد و تیشکیان خستە سەر داواکاریی رەوای خۆپیشاندەران لە خزمەتگوزاری و ئێستا و ئایندەیەکی باشتر و ئەو مامەڵە توندەی ڕووبەڕووی دەبنەوە، جەختیشیان لە ھەوڵ و ھەنگاونانی جددی بۆ بنەبڕکردنی توندوتیژی بەدەنگەوەچوونی داواکارییەکانی خۆپیشاندەران کردەوە.

لە پاڵ ئەمەش تاوتوێکردنی مەترسییەکانی سەرھەڵدانەوەی تیرۆر، فراوانبوونی جموجۆڵی تیرۆرستانی داعش لە چەندین ناوچەی جیای عێراق و گرنگیی رۆڵی ھاوپەیمانیی نێودەوڵەتی بۆ یارمەتیدانی عێراق و ھەرێمی کوردستان لە ڕووبەڕووبوونەوەی تیرۆرستان، ھەوڵەکانی پێکھێنانی کابینەی نوێی حکوومەتی عێراق، دۆخی ناوچەکە بەگشتی و چەند بابەتێکی جێی بایەخی ھەردوولا، بەشێکی دیکەی کۆبوونەکە بوون.