یه‌كێتی پێشوازی له‌ به‌شێك له‌ پارتە توركمان و مه‌سیحییه‌كان كرد

هه‌ولێر - AA
پێشوازیكردنی یه‌كێتی نیشتمانی کوردستان له‌ شاندی پارت و لایەنە توركمانی و مه‌سیحییه‌كان له‌چوارچێوه‌ی ئه‌و سه‌ردانانه‌ دێت كه‌ یه‌كێتی بۆ لای لایه‌نه‌كان هه‌فته‌یه‌كه‌ ده‌ستی داوه‌تێ.

ئه‌مڕۆ شاندێكی ژماره‌یه‌ك پارت و لایه‌نی توركمانی و مه‌سیحی سه‌ردانی مه‌كته‌بی سیاسیی یه‌كێتی نیشتمانی كوردستانییان كرد بۆ له‌نزیكه‌وه‌ ئاگاداربوون له‌ ورده‌كاریی سه‌ردانه‌كه‌ی شاندی یه‌كێتی بۆ ئێران كه‌ هه‌فته‌ی رابردوو له‌باره‌ی پرسی ریفراندۆمه‌وه‌ سه‌ردانی ئه‌و وڵاته‌یان كردبوو.

شانده‌كه‌ی هه‌ردوو پێكهاته‌ی توركمانی و مه‌سیحی پێكهاتبوون له‌ شه‌ش لایه‌ن و حزب كه‌ ئه‌وانیش له‌ لیستی توركمانی هه‌ولێر، پارتی چاكسازی پێشكه‌وتووی توركمان، كۆمه‌ڵه‌ی رۆشنبیری توركمان، نوێنه‌ری ئه‌رمه‌نەكان، كۆمه‌ڵه‌ی كلدانی سریانی ئاشووری و له‌ باڵه‌خانه‌ی مه‌كته‌بی سیاسیی یه‌كێتی نیشتمانی له‌ شاری هه‌ولێر پێشوازی كران و ئه‌وه‌شی تێبینی كرا نه‌بوونی نوێنه‌ری به‌ره‌ی توركمانی بوو كه‌ تێبینی له‌سه‌ر ریفراندۆمه‌كه‌ی هه‌رێم هه‌یه‌ و تا ئێستا له‌گه‌ڵیدانییه‌.

شاندی یه‌كێتی نیشتمانی كوردستانیش له‌ به‌رپرسی ده‌سته‌ی كارگێڕی یه‌كێتی مه‌لا به‌ختیار و ژماره‌یه‌ك له‌ به‌رپرسانی ئه‌و حزبه‌ پێكهاتبوو.

یه‌كێتی نیشتمانی كوردستان له‌كۆتایی هه‌فته‌ی رابردوو دوای ئه‌نجامدانی سه‌ردانێك بۆ كۆماری ئیسلامیی ئێران به‌مه‌به‌ستی زانینی بۆچوونی به‌رپرسانی پله‌ بڵند و ده‌زگا فه‌رمییه‌كانی ئه‌و وڵاته‌ له‌سه‌ر پڕۆسه‌ی ریفراندۆم كه‌ هه‌رێمی كوردستان به‌نیازه‌ له‌ كۆتاییه‌كانی ئه‌یلوولی ئه‌مساڵ و به‌دیاریكراوی له‌ 25ی ئه‌و مانگه‌ ئه‌نجامی بدات ژماره‌یه‌ك سه‌ردانی بۆ چه‌ندین لایه‌ن ده‌ستپێكرد بۆ گه‌یاندنی وه‌ڵام و بۆچوونه‌كانی ئێرانییه‌كان له‌سه‌ر ئه‌و پرسه‌.

شانده‌كه‌ی توركمانی و مه‌سیحییه‌كان و یه‌كێتی نیشتمانی كوردستان ئاماده‌نه‌بوون هیچ قسه‌یه‌ك بۆ راگه‌یاندنه‌كان بكه‌ن.