له‌ يه‌ك مانگدا نزيكه‌ى 500 خێزانی حه‌ويجه‌ بۆ كه‌ركووك هه‌ڵاتوون

یاریدەدەری فەوجی دووی لیوای دوو نەقیب ئاكۆ نەجم، بە ئاژانسی ئانادۆڵوی راگەیاند "ماوەیەكە بە بەردەوامی خێزانە عەرەبەكان لە سنووری داعشەوە هەڵدێنە سنوورەكانمان لە رۆژئاوای كەركووك كە ژمارەیان تاكو ئێستا گەیشتوەتە 400 بۆ 500 خێزان و هەندێكجاریش لە نێو ئەو خێزانانەدا ئێمە وەكو پێشمەرگە تیرۆریستی داعشمان دەستگیر كردووە چونكە هەر خێزانێك دێتە سنوورەكەمان لێكۆڵینەوەیان لەگەڵدا دەكەین لەبەر ئەوەی مەترسیمان هەیە داعش لەو رێگەیەوە دزە بكەنە ناو كەركووكەوە".
ئەو گوتی: "عەرەبەكان كاتێك دێنە سنوورەكانی پێشمەرگە دەڵێن بۆیە هاتووین چونكە تیرۆریستانی داعش مامەڵەیی مرۆڤانەمان لەگەڵدا ناكەن بەڵكو هەندێكجار باج و سەرانەمان لێوەردەگرن بۆ چەكدارەكانیان و رێگەمان نادەن بە ئاسایی بژیین".
ئەو ئەفسەری پێشمەرگە گوتی: "ئێمە مامەڵەی مرۆڤانەیان لەگەڵدا دەكەین و پاشان لێرەوە رەوانەی میحوەریان دەكەین بۆ ئەوەی ئەوانیش لێكۆڵێنەوەیان لەگەڵدا بكەن دوای ئەوەی هیچ كێشەیەكیان نەبوو ئەوا راستەخۆ ئازاد دەكرێن و دەتوانن بچنە كەركووكەوە ژیانی ئاسایی خۆیان بكەن بێ ئەوەی هیچ كەسێك لێیان بپرسێتەوە".
یەكێك لەو كەسانەی کە لە ژێر دەسەڵاتی داعش هەڵاتووە بەناوی محەمەد فەتاح، بۆ ئاژانسی ئانادۆڵوی گوتی: "ماوەی دوو رۆژە لە گوندی بەگارەی سەربە شارۆچكە حەویجەوە بەپێ هاتووین بۆ ئەوەی خۆمان بگەیەنینە سەنگەرەكانی پێشمەرگە و رزگارمان بێت لە ئەشكەنجەدانی داعش كە لە ماوەی رابردوو بە ئێمەی كرد لە گوندەكەمان بەڕاستی ئەوانە مرۆڤ نین".
گوتیشی: "ئێستا تیرۆریستانی داعش لە سنووری حەویجە زۆربەیان خەڵكی ووڵاتی عێڕاقن و بەشێكی زۆریان لە دیالەوە هاتوونەتە ناوچەكە و ژیانیان لە خەڵك تێكداوە و هەموو شتێك گران بووە و دەستیش ناكەوێت تەنانەت وایی لێهاتووە هەركەسێك ریش بتاشێت لە سێدارەی دەدەن".
لە ئێستادا سنووری نێوان پیشمەرگە بۆ شارۆچكەی حەویجە رۆژئاوای كەركووك كەمترە لە 20 كیلۆمەتر.