عێراق قەرزی لە سندووقی نێودەوڵەتی نەختینە وەرگرت

راوێژكاری دارایی سەرۆكوەزیرانی عێراق مەزهەر محەمەد ساڵح رایگەیاند، حكوومەتی وڵاتەكەی لە كۆی ئەو 5،3 ملیار دۆلارە، وەك هەنگاوی یەكەم، بڕی 634 ملیۆن دۆلاری وەك قەرز لە سندووقی نێودەوڵەتی نەختینە وەرگرتووە.

لە لێدوانێكدا بۆ ئاژانسی ئانادۆڵو ساڵح روونی كردەوە، سندووقی نێودەوڵەتی نەختی پێدانی ئەو 5،3 قەرزە بە 13 وەجبە دەداتە عێراق، كە سێیان لە نێو ساڵی 2016 دەبێت.

راوێژكارەكە گوتیشی: "دوێنێ‌ ئێوارە، حكوومەتی عێراق یەكەم وەجبە لەو قەرزە بە بڕی 634 ملیۆن دۆلاری لە سندووقی نێودەوڵەتی نەختینە وەرگرت".

بەرپرسەكەی عێراق ئاماژەی بەوەشكرد "وەجبەی دووەم و سێیەمی قەرزەكە کە لە نێو ئەم ساڵدا دەدرێتە عێراق، نزیكەی دوو ملیار دۆلارە".

محەمەد ساڵح دەشڵێت: "وەجبەی یەكەم لە قەرزەكانی سندووقی نێودەوڵەنتی نەختینە كە دوێنێ‌ عێراق وەریگرت، دەچێتە بواری خەرجكردنی بوودجەی گشتی و بۆ ئاوارەكان و فێربوون و تەندروستی و كۆبۆنی خۆراك و چاودێرلای كۆمەڵایەتی دابین دەكرێت".

لە مانگی ئایاری رابردوودا، عێراق و سندووقی نێودەوڵەتی نەختینە دوای چەندین كۆبوونەوە كە لە شاری عەممانی پایتەختی ئوردن سازیان كرد، گەیشتنە رێككەوتنێك كە بەپێی رێككەوتنەكە، سندووقی نێودەوڵەتی نەختینە بڕی 5.3 ملیار دۆلار بەسووی 1.5 لەسەدا، دەداتە عێراق.