حووسییەکان: "ھێرشمان کردووەتە سەر دوو ئامانجی گرنگ لە ئیسرائیل"

یەمەن ــ AA

حووسییەکان ڕایانگەیاند کە بە ئاراستەکردنی مووشەکی بالیستیکی، فڕۆکەخانەی بن گۆریۆن و ئامانجێکی دیکەیان لە ڕۆژھەڵاتی تەل ئەبیب ناوەڕاستی ئيسرائیل کردووەتە ئامانج.

گوتەبێژی سەربازیی حووسییەکان، یەحیا سەریع لە ڕاگەیاندراوێکدا ئاماژەی بەوەداوە کە چەکدارەکانیان، بە ئاراستەکردنی مووشەکێکی بالیستیکی، فڕۆکەخانەی دەیڤید بن گۆریۆن-یان لە تەل ئەبیب کردووەتە ئامانج.

ڕاشیگەیاندووە کە ھێرشەکە، ئامانجەکەی پێکاوە و بووەتە مایەی دروستبوونی ترس و دڵە ڕاوکێ لای ئیسرائیلییەکان، ھەروەھا بەھۆی ھێرشەکەوە، گەشتەکان لە فڕۆکەخانەی دەیڤید بن گۆریۆن، ڕاگیراون.

ھەروەھا باسی لەوەش کردووە کە بە ئاراستەکردنی مووشەکێکی ديكەى بالیستیکی، ئامانجی گرنگیان لە ڕۆژھەڵاتی تەل ئەبیب کردووەتە ئامانج.

پێشتر سوپای ئیسرائیل بانگەشەی ئەوەی کردبوو، ڕێگرییان لە دوو مووشەکی بالیستیکی کردووە کە لە یەمەنەوە ئاراستەی ئیسرائیل کرابوون.