بڕیاری دادگای دادی ئەورووپا لەبارەی برێکسیت-ەوە

بڕۆکسل - AA

دادگای دادی ئەورووپا بڕیاریدا بەریتانیا مافی ئەوەی هەیە کە بە شێوەیەکی تاکلایەنانە پڕۆسەی جیابوونەوە لە یەکێتیی ئەورووپا (برێکسیت) هەڵبوەشێنێتەوە.

دادگاکە کە باڵاترین دەسەڵاتی دادوەریی یەکێتیی ئەورووپایە و ناوەندەکەی لە لۆکسەمبۆرگە، بڕیاری سەبارەت بەو سکاڵایە دا کە لەبارەی برێکسیت-ەوە تۆمارکرابوو.

لە بڕیارەکەی دادگادا هاتووە، بەریتانیا دەتوانێت بە شێوەیەکی تاکلایەنانە راگەیەندراوی جیابوونەوە لە یەکێتیی ئەورووپا بکشێنێتەوە.

هەروەها تیایدا هاتووە "دادگا بڕیاریداوە کە ئەگەر بێت و وڵاتێکی ئەندامی یەکێتیی ئەورووپا نیازی خۆی بۆ جیابوونەوە بە کۆنسەی یەکێتییەکە رابگەیەنێت، ئەوا هەمان ئەو وڵاتە ئەندامە سەرپشکە لەوەی بە شێوەیەکی تاکلایەنە ئەم راگەیەندراوە هەڵبوەشێنێتەوە".