ئەمڕۆ کۆمیسیۆنی ناتۆ-ئۆکراینا کۆبوونەوەیەکی نائاسایی سازدەکات

بڕۆکسل - AA

ناتۆ ئاشکرایکرد، بە مەبەستی تاوتوێکردنی پێشهاتەکانی ناوچەی گەرووی کێرچی لە دەریای ئازۆڤ، ئەمڕۆ کۆمیسیۆنی ناتۆ-ئۆکراینا کۆبوونەوەیەکی نائاسایی سازدەکات.

لەدوای پەیوەندیی تەلەفۆنێی نێوان سکرتێری گشتیی ناتۆ، یانس ستولتنبێرگ و سەرۆکی ئۆکراینا، پێترۆ پۆرۆشێنکۆ سەبارەت بەو دۆخەی لەئێستادا لە ئارادایە، راگەیەندراوێک بڵاوکرایەوە.

لە راگەیەندراوەکەدا ئاماژە بەوەکراوە، یانس ستولتنبێرگ و پێترۆ پۆرۆشێنکۆ لە پەیوەندییە تەلەفۆنییەکەدا تاوتوێی پێشهاتەکانی گەرووی کێرچی-یان لە دەریای ئازۆڤ کردووە.

هەروەها لە راگەیەندراوەکەدا باس لەوەکراوە کە ستولتنبێرگ جەختی لە پشتیوانیی بەهێزی ناتۆ لە یەکپارچەیی خاکی ئۆکراینا، سەروەریی و ئازادیی هاتوچۆی ئەو وڵاتە لەنێو سنوورە ئاوییەکانیدا کردووەتەوە و ئاماژە بەوەشکراوە لەسەر داوای پۆرۆشێنکۆ ئەمڕۆ کۆمیسیۆنی ناتۆ-ئۆکراینا کۆبوونەوەیەکی نائاسایی سازدەکات.

چاوەڕوان دەکرێت کۆبوونەوەکە ئەمڕۆ لە بارەگای ناتۆ لەسەر ئاستی باڵیۆزان بەڕێوەبچێت.

سەرلەبەیانی دوێنێ کەشتییە جەنگییەکانی ئۆکراینا و رووسیا بەرەوڕووی یەکتر ببوونەوە و بە تۆمەتی ئەوەی سنوورە ئاوییەکانی رووسیایان بەزاندووە، کەشتییە جەنگییەکانی رووسیا بەرەنگاری کەشتییە جەنگییەکانی ئۆکراینا ببوونەوە.