ئەمڕۆ تەرمی سەرکۆماری ئۆزبەکستان بەخاک دەسپێردرێت

سەرکۆماری ئۆزبەکستان ئیسلام کەریمۆڤ، کە بەهۆی خوێنبەربوونی مێشکەوە کۆچی دواییکرد، ئەمڕۆ لە زێدی خۆی لە سەمەرقەند بەخاک دەسپێردرێت.

ئەمڕۆ تەرمی سەرکۆماری ئۆزبەکستان ئیسلام کەریمۆڤ، گەیەنرایەوە سەمەرقەند و لەلایەن هەزاران هاووڵاتییەوە پێشوازیی لێکرا.

بڕیارە لە دوای نوێژی نیوەڕۆ مەراسیمی بەخاکسپاردنی کەریمۆڤ دەستپێبکات و لە گۆڕستانێکی شاری سەمەرقەند بەخاک بسپێردرێت.

هاوکات جێگری سەرۆکوەزیرانی تورکیا توغروڵ تورکەش بەشداریی لە ریورەسمی بەخاکسپاردنەکەدا دەکات.

کۆچی دوایی سەرکۆماری ئۆزبەکستان ئیسلام کەریمۆڤ، دوێنێ لەلایەن حکوومەت و پەرلەمانی ئەو وڵاتەوە راگەیەنرا، دوای ئەوەی بەهۆی خوێنبەربوونی مێشکەوە، کەریمۆڤ دەستی بە وەرگرتنی چارەسەری پزیشکیی کردبوو.

ئیسلام کەریمۆڤ لە ساڵی ١٩٣٨ لە دایکبووە و لە ساڵی ١٩٨٩وە تاوەکو کۆچی دواییکرد، سەرکۆماری ئۆزبەکستان بوو.