دوو گوله‌ تۆپی دیكه‌ كه‌وتنه‌ شاری كلیس

دوو گوله‌ تۆپی دیكه‌ كه‌وتنه‌ شاری كلیس و له‌ئه‌نجامدا چوار ژن برینداربوون كه‌ یه‌كێكیان دووگیانه‌.

یه‌كێك له‌ گوله‌ تۆپه‌كان كه‌وته‌ پاركێكی ئۆتۆمبێله‌وه‌ و ئه‌وه‌ی دیكه‌ش كه‌وته‌ نێو باخچه‌ی ماڵێكه‌وه‌.

به‌پێی ئه‌و زانیارییانه‌ی ده‌ست ئانادۆڵو كه‌وتووه‌، یه‌كێك له‌ گوله‌ تۆپه‌كان كه‌وتۆته‌ پاركێكی ئۆتۆمبێلی نزیك شه‌قامی جمهووریەت و له‌ئه‌نجامدا دوو ژن برینداربوون.

نزیكه‌ی 10 خوله‌ك دواتر گوله‌ تۆپێكی دیكه‌ كه‌وته‌ نێو باخچه‌ی ماڵێكی گه‌ڕه‌كی بێشێڤله‌ره‌ و له‌ئه‌نجامدا دوو ژن برینداربوون كه‌ یه‌كێكیكان دووگیانه‌.

ده‌ستبه‌جێ دوای رووداوه‌كان ژماره‌یه‌كی زۆر ئۆتۆمبێلی فریاكه‌وتن و ئاگركوژێنه‌وه‌ گه‌یشتنه‌ شوێنه‌كان و برینداره‌كان گه‌یه‌ندرانه‌ نه‌خۆشخانه‌.

ژماره‌یه‌ك له‌ باڵەخانە و ئۆتۆمبێله‌كانی ده‌وروبه‌ری رووداوەکە زیانیان به‌ركه‌وت و هێزه‌كانی پۆلیسیش رێوشوێنی پێویستیان گرته‌به‌ر.

دوای رووداوه‌كه‌ فڕۆكه‌ی بێ فڕۆكه‌وان و سیستمی راداری هێزه‌ چه‌كداره‌كانی توركیا پێگه‌كانی داعشیان له‌ودیووی سنوور دیاریكرد و كرانه‌ ئامانجی تۆپبارانه‌كان.

به‌پێی زانیارییه‌كان له‌و دوو پێگه‌یه‌ی گوله‌تۆپه‌كانی تێدا به‌ره‌و كلیس ئاراسته‌كردبوو، 9 چه‌كداری رێكخراوی تیرۆرستی داعش كوژراون.