تورکیا..پرۆژە یاسایی هەڵگرتنی پارێزبەندی پەرلەمانتاران پەسند کرا

ئەو داواکارییەی بۆ گۆڕینی دەستووری تورکیا کە بەمەبەستی هەڵگرتنی پارێزبەندیی ژمارەیەک پەرلەمانتار پێشکەشکرابوو، لەلایەن لیژنەی دەستوورییەوە لە پەرلەمان، پەسەند کرا.

داواکارییەکە زیادکردنی ماددەیەکی کاتیی بۆ دەستووری تورکیا لەخۆدەگرێت و بەگوێرەی ئەو پێشنیارەی پەرلەمانتارانی ئاک پارتی پێشکەشیان کردووە، گۆڕانکارییەکە ئەنجامدرا.

بەم پێیەش، هەرکاتێک گۆڕانکارییەکە لە پەرلەمان پەسەندکرا، چیتر ماددەی ٨٣ی دەستوور کە تایبەتە بە رێکخستنی ''پارێزبەندیی یاسایی'' و تێیدا هاتووە :''ئەو پەرلەمانتارەی بانگەشەی ئەوە دەکرێت لە پێش یان دوای هەڵبژاردن تاوانێکی ئەنجامدابێت، بێ بوونی بڕیاری پەرلەمان ناتوانرێت دەستگیربکرێت، لێکۆڵینەوەی لەگەڵ بکرێت و دادگایی بکرێت'' چیتر کاری پێناکرێت سەبارەت بەو پەرلەمانتارانەی لەلایەن داواکارانی گشتیی و دادگاکانەوە دۆسیەکانیان رەوانەی وەزارەتی داد، سەرۆکایەتی ئەنجوومەنی وەزیران، سەرۆکایەتی پەرلەمان کراوە و داوای ئەنجامدانی لێکۆڵینەوە لەگەڵیاندا دەکرێت.

لەو بەروارەشەوە کە گۆڕانکارییە یاساییەکە دەچێتە بواری جێبەجێکردنەوە تاوەکو ١٥ رۆژ، ئەو دۆسیانەی سەبارەت بە داواکاریی هەڵگرتنی پارێزبەندی یاسایی پەرلەمانتاران رەوانەی هەریەک لە لیژنەی دەستوور و کۆمیسیۆنی هاوبەشی داد لە پەرلەمان، سەرۆکایەتی پەرلەمان، سەرۆکایەتی ئەنجوومەنی وەزیران و وەزارەتی داد کراون، دەگەڕێنرێنەوە بۆ لایەنە پەیوەندیدارەکان.

ئەو گۆڕانکارییە یاساییە لەو بەروارەوە دەچێتە بواری جێبەجێکردنەوە کە بڵاودەکرێتەوە و داواکارییەکەش دوای ئەوەی کە پەرلەمانتارانی هەدەپە کۆمیسیۆنەکەیان بەجێهێشت، بەکۆی دەنگ پەسەند کرا.