ئەنقەرە - AA

سەرکۆماری تورکیا، ڕەجەب تەیب ئەردۆغان ڕایگەیاند: "هەوڵە هاوبەشەکانی تورکیا و ژاپۆن وەک دوو وڵات کە خاوەن شارستانییەتی ڕیشەدارن، دەتوانن ڕێگای بەردەم چارەسەری بنیاتنەرانە بۆ کێشە جیهانییەکان بکەنەوە".

سەرۆکی فەرمانگەی پەیوەندییەکانی سەرۆکایەتی کۆماری تورکیا، بورهانەددین دوران لە تۆڕی کۆمەڵایەتیی ئێن سۆشیال بلاویکردەوە، ئەو گوتارەی سەرکۆمار ئەردۆغان نووسیویەتی و، تیایدا داوای ویژدانی هاوبەشی لە هەردوو سەری ئاسیا بۆ جیهان کردووە، بە زمانی ژاپۆنی و ئینگلیزی لە ڕۆژنامەی نیکی شیمبون کە یەکێکە لە ڕۆژنامە پێشەنگ و گرنگەکانی ژاپۆن بڵاوکراوەتەوە.

دوران باسی لەوە کرد سەرکۆمار ئەردۆغان لە گوتارەکەیدا جەختی لەسەر ئەوە کردووەتەوە کە پردی دۆستایەتیی نێوان تورکیا و ژاپۆن تەنیا لە بەڵگەنامە فەڕمییەکانەوە سەرچاوە ناگرێت، بەڵکو لە ویژدانی هاوبەش و هاریکارییە مرۆییەکان و بیرەوەرییە مێژووییەکانەوە وزە وەردەگرێت.

هەروەها دوران ئاماژەی بەوە کرد کە سەرکۆمار ئەردۆغان تیشکی خستووەتە سەر ئەوەی کە هاریکاریی تورکیا و ژاپۆن لە ڕووبەڕووبوونەوەی قەیرانە جیهانییەکاندا دەتوانێت چارەسەری بنیاتنەرانە بۆ مرۆڤایەتی بەرهەم بهێنێت، هاوکات باسی لە گرنگی دیپلۆماسی مرۆیی کردووە و پرۆژە هاوبەشەکانی TİKA و JICAی بە نموونە هێناوەتەوە.

ڕاشیگەیاندووە: "هەوڵە هاوبەشەکانی تورکیا و ژاپۆن وەک دوو وڵات کە خاوەن شارستانییەتی ڕیشەدارن، دەتوانن ڕێگای بەردەم چارەسەری بنیاتنەرانە بۆ کێشە جیهانییەکان بکەنەوە".

سەرکۆمار ئەردۆغان ئەوەیشی خستووەتەڕوو ڕۆشنبیری ژاپۆن کە ئاشتیی کردووەتە کاری لە پێشینە، پابەندبوونی بە یاسا نێودەوڵەتییەکان و هەستیاریی ویژدانی لەم پرۆسەیەدا زۆر بەنرخە. کاتێک کاریگەریی هەرێمیی تورکیا و توانای هاوکاری مرۆیی یەکدەگرن، هاوبەشییەکی بەشکۆ و بەهێز دێتە ئاراوە".

سەبارەت بە قەیرانی غەززە، سەرکۆمار ئەردۆغان لە گوتارەکەیدا ڕایگەیاندووە: "شایەتحاڵی دیمەنێک دەبین کە بەهۆی جینۆساید و داگیرکاریی ئیسرائیلەوە منداڵان لە برساندا دەمرن، نەخۆشخانەکان لە کار کەوتوون، شارەکان وێران بوون، ملیۆنان کەس لە سەرەتاییترین پێداویستییەکان بێبەش بوون. ئەم کارەساتە کێشەی هەموو مرۆڤایەتییە. ئێمە وەک تورکیا بێدەنگ نەبووین و نابین".