ئۆپەراسیۆنی بەرەنگاربوونەوەی داعش لە سێ پارێزگای عێراق
ھێزە ئەمنییەکانی عێراق ئۆپەراسیۆنێکیان لە پارێزگاکانی کەرکووک، سەڵاحەددین و دیالە دژبە چەکدارانی رێکخراوی تیرۆریستیی داعش دەستپێکرد.
Arbil
کەرکووک - AA
هێزەکانی پۆلیسی فیدرال و سوپا، بە هاوکاری و پشتیوانی هێزی ئاسمانی ئۆپەراسیۆنێکیان لە سنووری گوندەکانی زخەیتوون و شای سەربە ناحیەی رەشاد لە پارێزگای کەرکووک، هەروەها لە گوندەکانی رەمڵ و حمزیە لە سنووری پارێزگای سەڵاحەددین دەستپێکرد.
ئۆپەراسیۆنەکە بە هەماهەنگی سەرجەم هێزەکان لە کاتژمێر شەشی بەیانی دەستیپێکرد و هێزەکان لە درێژەی کێوماڵکردنی ناوچەکە، چوونە ناو گوندی زخەیتوون و گوندی شای و بەقوڵایی ٢٥ کیلۆمەتر پێشڕەوی و گەڕان و پشکنینان ئەنجامدا.
لە بارەی ئۆپەراسیۆنەکەوە ھێزەکانی فیرقەی پێنجی پۆلیسی فیدرال رایانگەیاند کە لە ئەنجامی پشکنینی وردی ناوچەکە، دەستیانگرتووە بەسەر پێنج حەشارگەی چەکدارانی رێکخراوی تیرۆریستیی داعش، هەروەها دەستبەرسەرداگرتنی تراکتۆرێک و سێ ماتوڕسکیلی چەکدارانی داعش و دۆزینەوەی ١٠ گاڵون ماددەی C4 و ١٠ بۆمبی چێندراویان راگەیاند.
فەرماندەی فیرقەی پێنجی ھێزەکانی پۆلیسی فیدرال، حەیدەر متەوری بە رۆژنامەنووسانی راگەیاند "ئامانجی ئێمە لەم ئۆپەراسیون و گەڕان و پشکنینانە، راونانی چەکدارانی داعشە لەو سنوورانە و گەڕاندنەوەی ئارامییە بۆ ئەو ناوچانەی جمۆجۆڵی چەکدرانی داعش تیادایە".
بەپێی قسەی ئەو فەرماندەیەی هێزەکانی پۆلیسی فیدرال، مەبەست لە ئۆپەراسیۆنەکە پاککردنەوەی ناوچەکە و ئامادەکارییە بۆ گەڕانەوەی خەڵکی ناوچەکە کە ئاوارەبوون. لەم بارەیەوە حەیدەر متەوری گوتی: "لەسەر راسپاردەی سەرۆکوەزیران و وەزیری ناوخۆ بۆ گەڕاندنەوەی خێزانە ئاوارەکانە بۆ ناوچەکانی خۆیان و دوای پشکنینەکانی ھێزە ئەمنیەکان و پاککردنەوەی ئەو ناوچانە، کار لەسەر گەڕاندنەوەی ئاوارەکانی ئەو ناوچانە دەکەین".
بەشێکی گرنگی ئۆپەراسیۆنەکە ناوچە جیاجیاکانی پارێزگای کەرکووک دەگرێتەوە و بەوپێیەی کە بەشێک لە زنجیرە چیاکانی حەمرین چەکدارانی داعش هاتوچۆی تیادا دەکەن.
ئۆپەراسیۆنی بەرەنگاربوونەوەی #داعش لە سێ پارێزگای #عێراق https://t.co/mSSVhfut8h pic.twitter.com/a1ujUiUAqN
هاوکات فەرماندی ئۆپەراسیۆنەکانی پارێزگای سەڵاحەددین، عەبدولمحسن حاتەم رایگەیاند "ئەم ئۆپەراسیۆنە بەھاوبەشی لەنێوان ھێزەکانی ئۆپەراسیۆنی پارێزگاکانی کەرکووک، سەڵاحەددین و دیالە دەستیپێکردووە و ئامانجمان پاککردنەوەی زنجیرە شاخەکانی حەمرینە و راونانی چەکدارانی داعشە لەو سنوورە".
عەبدولمحسن حاتەم راشیگەیاند "دوای ئەنجامدانی ژمارەیەک ئۆپەراسیۆنی ئەمنی لەو ناوچانە، لەئێستادا دۆخی ئەمنی لەو سنوورە باشترە و جمۆحۆڵی چەکدارانی داعش لەو سنوورە لاواز بووە".
گوتیشی: "زانیاری وردمان لەسەر جموجۆڵی چەکدارانی داعش لەو سنوورەدا ھەیە و ھەوڵی بنبڕکردنی یەکجاریان دەدەین".
بۆ خوێندنەوەی درێژەی ئەم هەواڵە و هەواڵەکانی دیکەی ئاژانسی ئانادۆڵو، ببە بە ئابۆنەی ئاژانسی ئانادۆڵو و کلیک لەسەر ئەم بەستەرە بکەن