ئەنتۆنی بلینکن: "پێشنیازەکەی سەرۆک بایدن باشترین ڕێگایە بۆ وستاندنی شەڕ لە غەززە"
وەزیری دەرەوەی ئەمریکا، ئەنتۆنی بلینکن: "نەتەوە یەکگرتووەکان، کۆمکاری عەرەبی و سەرجەم وڵاتانی ناوچەکە، پاڵپشتی لەو پێشنیازە دەکەن کە لەلایەن سەرۆک جۆ بایدنەوە بۆ گەیشتن بە ڕێککەوتنی ئاگربەست لەنێوان حەماس و ئیسرائیل لە غەززە، ڕاگەیاندراوە".
Qatar
دۆحە ــ AA
وەزیری دەرەوەی ئەمریکا، ئەنتۆنی بلینکن ڕایگەیاند، ئەو پێشنیازەی کە لەلایەن سەرۆکی وڵاتەکەی جۆ بایدن ڕاگەیاندراوە، باشترین ڕێگایە بۆ وستاندنی شەڕ لەنێوان ئیسرائیل و حەماس لە کەرتی غەززە.
ئەنتۆنی بلینکن لە لێدوانێکی بۆ کەناڵی جەزیرە ئاماژەی بەوەداوە، نەتەوە یەکگرتووەکان، کۆمکاری عەرەبی و سەرجەم وڵاتانی ناوچەکە، پاڵپشتی لەو پێشنیازە دەکەن کە لەلایەن سەرۆک جۆ بایدنەوە بۆ گەیشتن بە ڕێککەوتنی ئاگربەست لەنێوان حەماس و ئیسرائیل لە غەززە، ڕاگەیاندراوە، ھەروەھا بانگەشەی ئەوەشی کرد کە ئیسرائیل و دەسەڵاتدراێتی فەڵەستینش پاڵپشتی لە پێشنیازەکە دەکەن.
گوتیشی: "حەماس درەنگ کەوت لە پێشکەشکردنی وەڵامەکەی کە جێگای ڕەزامەندی لایەنەکانی دیکە نەبووە".
بانگەشەی ئەوەشی کرد کە حەماس ھەوڵدەدات، ھەندێک لە بەندەکانی نێو ئەو پێشنیازە بگۆڕێت کە ڕەزامەندی لەسەر نیشانداوە و گوتی: "لە ئێستادا، نێوەندگیرەکان، بەدواداچوون بۆ ئەو بابەتە دەکەن و ھەمووان چاوەڕێی بڕیارەکەی حەماس دەکەن".
