قودس - AA

سوپای ئیسرائیل کە بە بیانووی هەڵدانی مووشەک لەلایەن حیزبوڵڵاوە لوبنانی کردە ئامانج، لە ئاسمان و دەریاوە هێرشی کردە سەر تەواوی وڵاتەکە، بەتایبەتی بەیروت-ی پایتەخت.

لەو بارەیەوە، سوپای ئیسرائیل لە ڕاگەیاندراوێکدا ئاماژە بەوە کرد کۆمەڵێک هێرشی هاوکات لە لوبنان و ئێران ئەنجام دراون.

لە ڕاگەیاندراوەکەدا کە بانگەشەی ئەوە کرا لە بەیروت-ی پایتەختی لوبنان ئەندامانی باڵای حیزبوڵڵا بە مووشەکی ورد کراونەتە ئامانج، ئەوەش خراوەتەڕوو کە هێرشەکان لەلایەن هێزی ئاسمانی و دەریایی ئیسرائیلەوە ئەنجام دراون.

هەروەها لە ڕاگەیاندراوەکەدا بانگەشەی ئەوە کرا لە شاری سوور-ی لوبنان کۆگایەکی چەکی حزبوڵڵا کراوەتە ئامانج.

لە کاتێکدا سوپای ئیسرائیل بانگەشەی ئەوە دەکات ئەو ناوەندی فەرماندەییەی پێکاوە کە بۆ قووڵ کردنەوەی پەیوەندییەکانی نێوان ئێران و حزبوڵڵا بەکاردەهێنران، هەڕەشەی درێژەدان بە هێرشەکان دەکات دژی بڕیاری بەشداری کردنی حیزبوڵڵا لە جەنگی ئێراندا.