کۆجائێلی ــ AA

تورکیا، یەکەم کاروانی تانکەری گواستنەوەی نەوت لەسەر شەمەندەفەر کە لە پارێزگای کۆجائێلی باکووری رۆژئاوای تورکیا دروستکراون، رادەستی کۆمپانیای ھێڵی ئاسنینی عێراق کرد.

کۆمپانیای ھێڵەکانی ئاسنی عێراق گرێبەستێکی بۆ کڕینی ٤٠٠ تانکەری گواستنەوەی نەوت لەسەر شەمەندەفەر لەگەڵ کۆمپانیای "کریۆکان"ی تورکی واژووکردووە بە ئامانجی گواستنەوەی نەوت،ئەمڕۆ شەممە لەو ژمارەیە ٥٠ تانکەری رادەستکرا.

رادەستکردنی یەکەم کاروانی تانکەری گواستنەوەی نەوت لەسەر شەمەندەفەر بە عێراق لە رێورەسمیکدا بەڕێوەچوو کە وەزیری پیشەسازی و تەکنۆلۆجیای تورکیا، مستەفا ڤارانک تیایدا ئامادەبوو.

مستەفا ڤارانک لە میانی سەردانێکردنی کۆمپانیای "کریۆکان" رایگەیاند، کۆمپانیای ناوبراو کە لە ساڵی ٢٠٠٩ لە ناوچەی "چبزە" سەربە پارێزگای کۆجائێلی دامەزراوە، یەکێکە لە کۆمپانیا گەشەسەندنەوەکان لە تورکیا و گوتی: "ئەم کۆمپانیايە، ٨٠ لەسەدای بەرھەمەکانی بۆ ٦٦ وڵاتی جیھان ھەناردە دەکات".

لای خۆیەوە سەرۆکی ئەنجوومەنی کارگێڕی کۆمپانیای کریۆکان، تەکین ئۆرھان رایگەیاند کە لەئێستادا، کۆمپانیای ھێڵی ئاسنیی عێراق دەستکردووە بە جێبەجێکردنی پڕۆژەی گۆڕینی گواستنەوەی نەوت لەرێگای وشکانییەوە بەرێگای ھێڵی ئاسنیی و ئاماژەی بەوەیشدا کە ئامانجیانە، تا کۆتایی ئەمساڵ ١٠٠ تانکەری گواستنەوەی نەوت لەسەر شەمەندەفەر رادەستی عێراق بکەن و گوتی: "ئەو ٤٠٠ تانکەرەی گواستنەوەی نەوت لەسەر ھێڵی شەمەندەفەر تا کۆتایی ساڵی ٢٠٢٢ رادەستی عێراق دەکەین".