Manchester United një muaj pa anësorin Shaw

Anësori i majtë i Manchester Unitedit, Luke Shaw do të jetë një muaj jashtë fushës për shkak të lëndimit, transmeton Anadolu Agency (AA).

Shaw u lëndua në ndeshjen e së shtunës të Premier Ligës në të cilën United shënoi fitore si mysafir tek Everton me rezultatin 3:1. Përpara duelit Ole Gunnar Solskjaer, trajneri i "djajve të kuq" u ankua për orarin e ngushtë dhe faktin që pas duelit të Ligës së Kampionëve të mërkurën në Turqi atyre iu desh të luanin në Goodison Park të shtunën në ora 12:30 sipas kohës lokale.

Ai po ashtu mori mbështetje nga shumë trajnerë të tjerë në Premier Ligë ndërsa konfirmimi i shqetësimit të tij erdhi kur Shaw u lëndua.

Lojtari 25-vjeçar këtë sezon ka luajtur 10 ndeshje për Manchester Unitedin.