Përderisa bota përballet me valë të reja konflikti dhe trazirash, fshati i vogël Shqipe pranë qytetit boshnjak të Prozorit është bërë qendër e një mesazhi të fuqishëm paqeje, bashkëjetese dhe dialogu ndërfetar.
Në iftarin e përbashkët me banorët e fshatit Shqipe, pranë të njëjtës tryezë u ulën imami lokal Mufid ef.Hero dhe prifti Branko Juriq.
Juriq, i cili të ëmën e ka nga fshati Shqipe, vitin e kaluar organizoi një tubim të ngjashëm në këtë fshat, ndërsa këtë vit organizimin e morën vetë banorët dhe vendosën të ftojnë për iftar atë dhe imamin Hero.
Të dy zyrtarët fetarë, së bashku pranë sofrës së iftarit, kujtuan se dialogu, respekti i ndërsjellë dhe afërsia njerëzore janë themeli i një shoqërie të qëndrueshme, duke konfirmuar gjithashtu imazhin e Bosnjë e Hercegovinës që banorët e saj trashëgojnë shekuj me radhë, ku, siç thanë edhe vetë, e mira dhe e keqja ndahen me fqinjët.
Imazhet nga Shqipe janë dëshmi se shenjtëria e agjërimit në Bosnjë e Hercegovinë, qoftë e Ramazanit apo kreshmës, gjithmonë është matur edhe me zemërgjerësinë ndaj tjetrit. Kjo është një pamje e një vendi që shekuj me radhë mbijetoi mbi traditën e delikat të solidaritetit dhe marrëdhënieve të mira me fqinjët.
- Solidariteti përmes agjërimit
Prifti Juriq në një intervistë për Anadolu tha se pamje të tilla duhet të jenë të zakonshme në Bosnjë e Hercegovinë.
"Mendoj se kjo duhet të jetë normale në vendin tonë ku jetojmë bashkë shekuj me radhë. Si përfaqësues fetarë, së pari duhet t'u tregojmë njerëzve se duhet të bashkëpunojnë, të bëhen miq dhe të ndajnë të mirën, por edhe të keqen nëse na ndodh", tha Juriq.
Ai bëri një paralelizëm mes agjërimit katolik dhe atij islam, duke theksuar se thelbi i të dyjave është i njëjtë, pra të ndjesh mungesën për t'u solidarizuar me ata që nuk kanë.
Në kontekstin e konflikteve aktuale në Lindjen e Mesme, Juriq theksoi rëndësinë e ndërtimit të paqes, duke nënvizuar se kjo nuk është një gjendje statike që vjen vetë.
"Paqja ndërtohet ditë pas dite. Ne që kemi përjetuar luftën në Bosnjë e Hercegovinë duhet të vlerësojmë më shumë paqen dhe të punojmë për të, jo të jemi pasivë", theksoi Juriq duke vënë në dukje se humbja e njerëzimit është fakti që sot jemi dëshmitarë të vatrave të reja lufte.
Për të dy zyrtarët fetarë, fakti që Ramazani dhe kreshma bien njëkohësisht këtë vit nuk është rastësi, por mundësi për mirëkuptim më të madh ndërmjet njëri-tjetrit. Mesazhi nga fshati Shqipe është i qartë: e ardhmja është në unitet, sepse "nuk mund të jemi pa njëri-tjetrin".
- E ardhmja në unitet
Imami Hero gjithashtu vlerësoi se mesazhi nga fshati Shqipe ka simbolikë të fuqishme, veçanërisht për Bosnjë e Hercegovinën.
"Mesazhi është shumë figurativ dhe duhet të ndikojë në ngjarjet e sotme, veçanërisht në botë. Dëshira ime më e madhe është që ngjarje të tilla të kontribuojnë në bukurinë e jetës në Bosnjë e Hercegovinë dhe të tregojnë se bashkëjetesa është e mundur. Veçanërisht e rëndësishme është që brezat e rinj të marrin shembull nga këto raste", tha Hero.
Ai theksoi se marrëdhëniet ndërmjet njerëzve në zonën e tyre, në Prozor, janë jashtëzakonisht të mira dhe se bashkëjetesa dhe bashkëpunimi janë pjesë e përditshme.
Duke folur për faktin që këtë vit Ramazani dhe kreshma përsëri përkojnë, Hero tha se kjo është një mesazh i fuqishëm për besimtarët që të afrohen dhe të njohin vlerat e përbashkëta.
"E ardhmja jonë është në bashkësi. Nuk mund të jemi pa njëri-tjetrin. Duhet të ruajmë atë që është i yni dhe të respektojmë të tjerët, sepse vetëm përmes së mirës mund të ndërtojmë një të ardhme të suksesshme", theksoi ai.
Iftari i përbashkët në Shqipe konfirmoi edhe një herë se paqja, dialogu dhe respekti i ndërsjellë janë vlera të përhershme të shoqërisë së Bosnjë e Hercegovinës.
Iftari në Shqipe u organizua si një përmbyllje simbolike e një aksioni disa-ditor pastrimi të fshatit ndërsa organizatorët donin të dërgonin mesazh për rëndësinë e ruajtjes së natyrës dhe forcimit të ndërgjegjes ekologjike si dhe të uronin vendlindjen për Ditën e Pavarësisë së Bosnjë e Hercegovinës.
