Meta reagon për zhvillimet në Maqedoni

TIRANË (AA) - Kryetari i Kuvendit të Shqipërisë, Ilir Meta, ka reaguar lidhur me zhvillimet e fundit në Maqedoni, transmeton Anadolu Agency (AA).

Në deklaratën e publikuar nga Kuvendi i Shqipërisë, Meta "shpreh keqardhjen për retorikat nacionaliste".

"Shpreh shqetësimin për situatën e rënduar politike në Maqedoni dhe inkurajoj të gjitha forcat politike në vendin fqinj për qetësi, përgjegjshmëri dhe konstruktivitet. Dëshiroj të shpreh gjithashtu keqardhjen për retorikat nacionaliste anti-shqiptare të cilat cenojnë harmoninë dhe bashkëjetesën ndëretnike, si garanci për stabilitetin e vendit fqinj", thuhet në deklaratën e kryeparlamentarit Meta.

Në fund ai thekson se shpreson që gjithë aktorët institucionalë dhe politikë të tregojnë përkushtim për progresin demokratik dhe euro-atlantik të Maqedonisë.

Kujtojmë se Presidenti i Maqedonisë, Gjorge Ivanov, nuk ia dha mandatin për krijimin e qeverisë së re kryetarit të Lidhjes Social Demokratike të Maqedonisë, Zoran Zaev me pretendimin se “nuk do të japë mandatin për formimin e qeverisë së re çdo kujt i cili negocion për platforma të vendeve të huaja me të cilat cenohet populli maqedonas dhe kërcënohet shteti unitar dhe sovraniteti”.