Rifillon shërbimi ajror mes kryeqyteteve të Turqisë dhe Sirisë

STAMBOLL (AA) - Ministri turk i Transportit dhe Infrastrukturës, Abdulkadir Uraloğlu, ka bërë të ditur se fluturimi i parë pas shumë vitesh mes kryeqyteteve të Turqisë dhe Sirisë është realizuar sot, raporton Anadolu.

Uraloğlu tha se fluturimi i parë nga Aeroporti Esenboğa i Ankarasë drejt Aeroportit Ndërkombëtar të Damaskut u realizua të premten.

“Ura jonë e re e zemrave që lidh Ankaranë me Damaskun ka marrë jetë si një simbol i miqësisë sonë të hershme”, theksoi ministri turk.

Ai bëri të ditur se shërbimi ajror do të ofrohet tre herë në javë, të hënave, të premteve dhe të dielave.

Fluturimi i parë mes Ankarasë dhe Damaskut u krye nga kompania ajrore turke AJet.

Këtë javë, kompania AJet gjithashtu ka nisur operimin e fluturimeve nga Aeroporti Sabiha Gökçen i Stambollit drejt Damaskut.