Ushtria izraelite plagos 3 peshkatarë palestinezë në brigjet e Gazës

Forcat detare izraelite kanë plagosur sot tre peshkatarë palestinezë në brigjet e Gazës, raporton Anadolu Agency (AA).

Kreu i komitetit të peshkatarëve në Unionin e Komiteteve të Punës Bujqësore në Gaza, Zakaria Baker tha se forcat izraelite sulmuan varkën e peshkatarëve teksa peshkonin në brigjet e Gazës dhe plagosën tre peshkatarë me plumba gome.

Ai shtoi se tre peshkatarët, Naser Ali Baker, Mohammad Jaber Baker dhe Mohammad Fakhri Baker, u transferuan në spital për trajtim.

Ushtria izraelite ende nuk është prononcuar mbi incidentin.

Sipas Ministrisë palestineze të Bujqësisë, rreth 4.000 palestinezë punojnë në sektorin e peshkimit në Gaza.

Peshkatarët palestinezë shpesh vuajnë nga shkelje të shumta izraelite, përfshirë përpjekjen për të fundosur varkat palestineze në det, duke gjuajtur mbi to, si dhe duke ngushtuar zonën e peshkimit për periudha të gjata.