Stoltenberg përjashton mundësinë e vazhdimit të mandatit si shef i NATO-s

Sekretari i Përgjithshëm i NATO-s, Jens Stoltenberg ka përjashtuar mundësinë e vazhdimit të mandatit të tij si shef i Aleancës ushtarake Euro-atlantike, transmeton Anadolu.

Duke folur me gazetarët gjatë rrugës për në një takim të ministrave të Mbrojtjes të NATO-s në Bruksel, Stoltenberg tha se ai nuk ka "ndonjë qëllim për të kërkuar një zgjatje tjetër" të mandatit të tij si Sekretar i Përgjithshëm i NATO-s.

Duke shërbyer si shef i NATO-s që nga viti 2014, mandati i Stoltenberg-ut u zgjat në vitin 2022 për shkak të luftës së Rusisë në Ukrainë.

Norvegjezi do të japë dorëheqje në muajin shtator. Kryeministrja daneze, Mette Frederiksen dhe Sekretari britanik i Mbrojtjes, Ben Wallace, thuhet se janë dy pretendentët e mundshëm për postin e lartë në grupin e udhëhequr nga SHBA-ja.

- Mbështetja për Ukrainën

Takimi dyditor i ministrave të Mbrojtjes së NATO-s do të nisë me një sërë diskutimesh mbi situatën në Ukrainë.

Shefi ukrainas i mbrojtjes, Oleksii Reznikov, do të bashkohet me homologët e tij të NATO-s në takimet e Grupit të Kontaktit të Mbrojtjes së Ukrainës të udhëhequr nga SHBA-ja dhe Komisioni NATO-Ukrainë.

Stoltenberg tha se mbështetja e NATO-s për Ukrainën bën "ndryshim në fushën e betejës" derisa Kievi po përparon me kundërsulmimin e tij kundër Rusisë. Ai tha se ministrat e Mbrojtjes të NATO-s pritet të bëjnë "shumë premtime të reja" për të ndihmuar Ukrainën.

Ai shpjegoi se përveç furnizimit të mëtejshëm me municion, Ukraina ka nevojë për mbështetje për mirëmbajtjen e sistemeve të mbrojtjes që tashmë janë dorëzuar.

- Përgatitjet për samitin në Vilnius

Ministrat e Mbrojtjes së vendeve të NATO-s gjithashtu do të përgatiten për Samitin e liderëve të NATO-s, që do të mbahet në kryeqytetin lituanez, Vilnius më 11-12 korrik.

Për të forcuar aftësitë mbrojtëse dhe parandaluese të NATO-s, siç tha Stoltenberg, në takim do të diskutohen "planet e reja rajonale si dhe modeli dhe struktura e re e forcës".

Ata do të adresojnë skenarë për rritjen e objektivit të investimeve në mbrojtje nga 2 përqindëshi aktual i Prodhimit të Brendshëm Bruto (PBB).

Shefi i NATO-s tha se ministrat do të diskutojnë mbi planet për të rritur prodhimin e industrisë së mbrojtjes dhe rimbushjen e rezervave duke vendosur një objektiv më të lartë aftësie për municione vendimtare për betejën për çdo vend të NATO-s.

Ai shtoi se ata pritet të miratojnë një qendër të re të NATO-s për mbrojtjen e infrastrukturës kritike në Mbretërinë e Bashkuar.