SHBA riafirmon se Bregu Perëndimor ndodhet "nën pushtimin e Izraelit"

Zëdhënësi i departamentit amerikan të shtetit, Ned Price, ka deklaruar se "është një e vërtetë historike se Izraeli pas luftës në vitin 1967 ka pushtuar Bregun Perëndimor, Gazën dhe Lartësirat Golan", transmeton Anadolu Agency (AA).

Në një konferencë ditore për media, Price u përgjigj pyetjeve lidhur me qasjen e SHBA-së, kryesisht për statusin e Bregut Perëndimor.

"Po", u përgjith Price, duke shtuar se, "Është një e vërtetë historike se Izraeli pas luftës në vitin 1967 ka pushtuar Bregun Perëndimor, Gazën dhe Lartësirat Golan. Pikërisht për këtë arsye edhe në raportin për të Drejtat e Njeriut 2020 është përdorur kjo shprehje lidhur me Bregun Perëndimor. Ky ka qenë edhe pozicioni i përbashkët i qeverive të mëparshme. A mendoni se Bregu Perëndimor ndodhet nën pushtim?".

Këtë vlerësim Price e dha në përgjigje të pyetjes së drejtuar duke iu referuar pjesës për Izraelin në raportin për të Drejtat e Njeriut 2020 të SHBA-së.

Ndërsa ndaj pyetjes se përse administrata e SHBA-së, e cila mendon se situata e Bregut Perëndimor është pushtim, nuk bën thirrjen që të "përfundojë menjëherë pushtimi", Price u përgjigj, "Për këtë arsye nevojitet zgjidhja me dy shtete".

Administrata e ish-presidentit Donald Trump kishte hequr termin "nën pushtim" të raportit për të drejtat e njeriut të vitit të mëparshëm në pjesën për Izraelin dhe në vend të saj kishte vendosur shprehjen "Izraeli, Bregu Perëndimor dhe Gaza". Ndërsa në raportin e parë për të drejtat e njeriut të administratës së presidentit Biden, shprehja "Izraeli, Bregu Perëndimor dhe Gaza" është përdorur e njëjtë, por në tekst për Bregun Perëndimor është rishtuar termi "nën pushtim".

Price paralajmëron Izraelin për vendbanimet e reja

Në anën tjetër, Price theksoi se të dy palët duhet të distancohen nga çdo hap që do të pengojë zgjidhjen me dy shtete.

"Lidhur me çështjen e vendbanimeve të reja, Izraeli duhet të distancohet nga hapat e njëanshme që do të rrisin tensionin dhe që do të pengojnë përpjekjet për zgjidhjen me dy shtete", tha Price.

Në të njëjtën mënyrë edhe pala e Palestinës duhet të distancohet nga hapat që do të rrisin tensionin, theksoi Price, duke shtuar se hapat negative pavarësisht se nga cila palë hidhen dëmtojnë seriozisht përpjekjet për zgjidhjen me dy shtete.