"SHBA dhe NATO i ofruan Rusisë masa të çarmatimit"

Sipas dokumenteve të siguruara nga e përditshmja spanjolle ‘El Pais’, SHBA dhe NATO nuk do të ndërrojnë pozicionin mbi kërkesën e Rusisë për të ndaluar hyrjen e Ukrainës në aleancën perëndimore të sigurisë, por kanë ofruar të negociojnë për masa të çarmatimit, transmeton Anadolu Agency (AA).

‘El Pais’ raportoi se ka pasur qasje në dy dokumente të fshehta të dërguara në Moskë të mërkurën e kaluar nga qeveria amerikane dhe NATO, të cilat japin hollësira mbi negociatat në vazhdim rreth krizës në Ukrainë.

Në përgjigje, SHBA dhe NATO refuzuan dy kërkesat kryesore të Moskës. Njëra ishte ndalimi i hyrjes së Ukrainës në NATO dhe tjetra ishte nënshkrimi i një marrëveshjeje për sigurinë në Evropë që Rusia tashmë e ka hartuar.

Megjithatë, forcat aleate kanë ofruar të negociojnë masa të çarmatimit dhe propozime të tjera të sigurisë në këmbim të tërheqjes së rreth 100 mijë ushtarëve të Rusisë të vendosur rreth kufirit me Ukrainën.

"Pozicioni i qeverisë së SHBA-së është se përparimi në këto çështje mund të arrihet vetëm në një mjedis të de-përshkallëzuar në lidhje me veprimet kërcënuese të Rusisë ndaj Ukrainës", thuhet në përgjigjen e SHBA-së ndaj Moskës.

Disa propozime të SHBA-së sugjerojnë që të bien dakord për më shumë kufizime për raketat dhe armët jo-strategjike.

SHBA po ashtu i ofron Rusisë një "mekanizëm transparence" që do t’i lejojë Rusisë të vërtetojë mungesën e raketave të lundrimit ‘Tomahawk’ në bazat e NATO-s në Rumani dhe Bullgari.

Megjithatë, që kjo të ndodhë, sipas dokumenteve zyrtarët amerikanë po ashtu duan të vërtetojnë kapacitetin raketor të Rusisë në dy baza ruse sipas zgjedhjes së tyre.

Përgjigjet e NATO-s dhe SHBA-së ishin të ngjashme, por përmbanin disa dallime të vogla. Për shembull, administrata e presidentit Joe Biden tha se është e hapur për të diskutuar konceptin e "pandashmërisë së sigurisë", ndërsa NATO për këtë çështje tha jo.

‘El Pais’ tha se Moska po u bën thirrje dy palëve negociuese të unifikojnë përgjigjet e tyre.