Putin: Elitat perëndimore përpiqen të prishin dialogun midis Rusisë dhe SHBA-së

Presidenti i Rusisë, Vladimir Putin deklaroi se kontaktet që nisën me SHBA-në japin shpresë, transmeton Anadolu.

Putin iu drejtua zyrtarëve të Shërbimit Federal të Sigurisë (FSB) në një takim të mbajtur në Moskë ku tha se "bota po ndryshon me shpejtësi". "Kontaktet e para me administratën amerikane japin shpresë. Ekziston një qëllim i ndërsjellë për të bashkëpunuar në rivendosjen e marrëdhënieve ndërshtetërore dhe zgjidhjen graduale të problemeve sistemike dhe strategjike që janë akumuluar në sasi të konsiderueshme në botë", tha ai.

Sipas presidentit rus, problemet në fjalë kanë çuar në kriza rajonale, përfshirë Ukrainën. "Ne jemi të vetëdijshëm se jo të gjithë janë të kënaqur me rifillimin e kontakteve ruso-amerikane. Elitat perëndimore janë të vendosura të ruajnë paqëndrueshmërinë në botë dhe do të përpiqen të prishin dialogun midis Rusisë dhe SHBA-së", tha Putin.

Ai theksoi se Rusia është e detyruar të parandalojë përpjekje të tilla prishjeje duke përdorur kapacitetin e plotë të diplomacisë dhe shërbimeve të saj të sigurisë.

"Administrata e re në SHBA nuk përqafon shumë 'mendime të verbërta' në krahasim me administratën e mëparshme. Partnerët aktualë në SHBA tregojnë pragmatizëm dhe pikëpamje realiste, duke hedhur poshtë klishetë", tha Putin.

Putin shtoi se Rusia e nisi procesin e zgjidhjes së krizave falë një "operacioni ushtarak special". "Rusia kurrë nuk ka refuzuar të zgjidhë krizën ukrainase në mënyrë paqësore", tha ai.