OKB kërkon nga Koreja e Veriut bisedime kuptimplote me SHBA-të

Organizata e Kombeve të Bashkuara (OKB) dje ka zhvilluar një takim të Këshillit të Sigurimit pas lëshimit të fundit të raketave nga Koreja e Veriut, raporton Anadolu Agency (AA).

Britania e Madhe, Franca dhe Gjermania i kërkuan Phenianit të zhvillojë bisedime kuptimplote me SHBA-të mbi programet e saj të raketave bërthamore dhe balistike.

“Sanksionet ndërkombëtare duhet të qëndrojnë në fuqi dhe të zbatohen plotësisht derisa programet e raketave bërthamore dhe balistike të Koresë së Veriut të shpërbëhen”, tha e dërguara britanike në OKB, Karen Pierce.

Pierce theksoi se “thelbësore” është që Këshilli i Sigurimit i OKB-së të tregojë unitet në mbrojtjen e rezolutave.

Raketat e Koresë së Veriut u lëshuan nga e njëjta zonë lindore si ato të fundit, ajo e ditës së mërkurë dhe e ditës së enjte para kësaj të fundit.

Mediat shtetërore të Koresë së Veriut po ashtu paralajmëruan se lançimet e saj të fundit ishin një paralajmërim për Korenë e Jugut në prag të stërvitjeve ushtarake të planifikuara të këtij muaji me SHBA-të.

SHBA ka minimizuar rëndësinë e raketave me rreze të shkurtër të Phenianit, por kësaj të fundit i është ndaluar testimi i raketave balistike me rezolutat e Këshillit të Sigurimit të OKB-së.