"Nuk ka zgjidhje ushtarake për krizën në Libi"

Gjatë bisedës në mes zyrtarëve të Turqisë dhe Rusisë u ritheksua bindja se për krizën e Libisë nuk ka zgjidhje ushtarake, transmeton Anadolu Agency (AA).

Ministria e Punëve të Jashtme të Turqisë publikoi deklaratën e përbashkët të Këshillit të nivelit të lartë turko-rus për bashkëpunim lidhur me çështjen e Libisë.

Deklarata thekson se Rusia dhe Turqia më 8 janar të këtij viti ndërmorën një nismë me qëllim të qetësimit të situatës në Libi dhe vendossjes së bazave të procesit politik dhe se të dyja vendet janë përcaktuar për sovranitetin, pavarësinë dhe integritetin territorial të Libisë dhe se janë të përkushtuar në qëllimet dhe parimet e Kartës së Kombeve të Bashkuara.

Rusia dhe Turqia shprehën bindjen se kriza e Libisë nuk ka gjasa për zgjidhje ushtarake dhe se problemi mund të zgjidhet vetëm me proces politik të udhëhequr nga libianët dhe me ndihmën e OKB-së.

"Gjatë bisedimeve u potencua nevoja për vazhdimin e luftës kundër struktuarave terroriste dhe individëve në Libi të cilën e ka konfirmuar Këshilli i Sigurimit të OKB-së", thuhet në deklaratë.

Më tej është përsëritur përkushtimi për mbajtjen e takimeve dypalëshe për të garantuar sigurinë dhe stabilitetin si dhe përmirësimin e gjendjes humanitare në Libi.