Militantët e DEASH-it sulmojnë fushën e naftës në Kirkuk të Irakut

Militantë të dyshuar të DEASH-it përdorën një pajisje shpërthyese për të sulmuar një fushë nafte në krahinën veriore Kirkuk të Irakut, sipas një oficeri të policisë lokale, transmeton Anadolu Agency (AA).

Asnjë dëm nuk u raportua në sulmin në fushën e naftës Bai Hassan, tha burimi, i cili foli në kushte anonimiteti.

Ai tha se forcat e sigurisë kanë nisur kërkimet pas sulmuesve.

Në provincën Kirkuk ndodhen fushat e naftës Bai Hassan, Baba Gurgur dhe Havana, të cilat së bashku prodhojnë më shumë se 370.000 fuçi në ditë.

Deri më tani askush nuk e ka marrë përgjegjësinë për sulmin.

Terroristët e DEASH-it kanë përshkallëzuar sulmet e tyre në muajt e fundit, veçanërisht në zonën midis Kirkukut, Salahuddinit dhe Diyalas, ndryshe të njohura si Trekëndëshi i Vdekjes.

Në vitin 2017, Iraku shpalli fitoren ndaj DEASH-it duke rimarrë të gjitha territoret që grupi terrorist kontrollonte që nga vera e vitit 2014, që vlerësohej se përbënin rreth një të tretën e territorit të vendit.

Grupi, megjithatë, ende ruan celulat e heshtura në zona të mëdha në Irak dhe herë pas here kryen sulme sporadike.