Macri: Për problemet globale, nevojiten zgjidhje globale

BUENOS AIRES (AA) - Presidenti i Argjentinës, Mauricio Macri, në fjalën e hapjes së Samitit të Liderëve të G20-tës, tha se "botës i duhen zgjidhje globale për problemet globale", raporton Anadolu Agency (AA).

• Fillon Samiti i Liderëve të G20-tës

Në fjalën e tij në samitin në të cilin marrin pjesë liderët e 19 vendeve dhe Bashkimit Evropian (BE), Macri rikujtoi se samiti i G20-tës organizohet për herë të parë në Argjentinë dhe shtoi se organizimi i këtij takimi në Argjentinën e cila ishte "lënë e vetmuar" për një kohë të gjatë, flet për mbështetjen që i jepet këtij vendi në arenën ndërkombëtare.

"Duhet të tregojmë se botës i nevojiten zgjidhje globale për problemet globale. Duhet të përfitojmë nga mundësitë që i kemi. Problemet mund t'i zgjidhim vetëm përmes dialogut. Të gjithë pajtohemi për të mbështetur zhvillimin e qëndrueshëm", tha Macri.

"Kemi marrë përsipër kryesimin e G20-tës me bindjen se mund të kontribuojmë në bashkëpunimin ndërkombëtar dhe multilateralitetin. Në një botë me diversitete, prania e G20-tës shpërfaq rritjen e dialogut që respekton dallimet dhe veprime të bazuara në fusha të ndryshme", shtoi presidenti argjentinas, njëherësh kryesues i radhës i samitit të G20-tës.