Ayhan Şimşek
02 Shkurt 2019•Përditësim: 03 Shkurt 2019
BERLIN (AA) - Gjermania tha se është kundër vendosjes së raketave të reja bërthamore me rreze të mesme në Evropë pasi SHBA dhe Rusia njoftuan tërheqjen e tyre nga traktati i rëndësishëm i armëve bërthamore, transmeton Anadolu Agency (AA).
"Vendosja e raketave bërthamore me rreze të mesme në Evropë tani do të ishte një reagim i gabuar. Nuk mund të shuajmë zjarrin duke i hedhur benzinë zjarrit", tha ministri i Jashtëm gjerman Heiko Maas në një intervistë për "Funke Media Group".
Maas tha se Gjermania planifikon që muajin e ardhshëm të organizojë një konferencë ndërkombëtare për çarmatim në Berlin, e cila do të përqendrohet në sistemet e reja të avancuara të armëve.
"Ne kemi nevojë për rregulla të reja për teknologjitë e reja", tha ai, duke iu referuar raketave të avancuara, sistemeve të armëve autonome, armëve kibernetike dhe robotëve vrasës.
SHBA-të akuzuan Rusinë për shkeljen e Traktatit të Armëve Bërthamore me Rreze të Mesme (INF) ndërsa të premten njoftuan tërheqjen nga pakti, i cili mund të hyjë në fuqi më 2 gusht.
Sot, në një përgjigje simetrike edhe presidenti rus Vladimir Putin njoftoi se Rusia pezullon detyrimet e marrëveshjes INF.
Traktati është parë gjerësisht si një gurthemel i sigurisë evropiane në epokën e pas Luftës së Ftohtë.
Traktati u nënshkrua në vitin 1987 ndërmjet SHBA-ve dhe Rusisë. Traktati i INF-së i ndalonte të dy vendet të zotëronin dhe të testonin lançimin e raketave me distancë prej 500 deri në 5.500 kilometra.
