BE: Turqia është vend kandidat dhe aleate e NATO-s

Zëdhënësi i Komisionit Evropian, Peter Stano deklaroi se Turqia zhvillon bisedime për anëtarësim në BE, është aleate e NATO-s dhe se marrëdhëniet duhet të reflektojnë këto elemente, transmeton Anadolu Agency (AA).

Stano iu përgjigj një pytjeje lidhur me vizitën që do të zhvillojë më 6-7 korrik në Turqi, përfaqësuesi i Lartë i BE-së për Marrëdhënie me Jashtë dhe Politika të Sigurisë, Josep Borrell.

Zëdhënësi Stano tha se Borrell do të takohet të hënën me ministrin e Jashtëm të Turqisë, Mevlüt Çavuşoğlu dhe se detajet shtesë lidhur me vizitën do të bëhen të ditur kur të qartësohen.

Në bisedime do të diskutohen marrëdhëniet Turqi-BE dhe disa probleme që janë shfaqur me vendet anëtare, tha Stano duke shtuar se problemet do të zgjidhen më lehtë përmes dialogut.

Ai tha se vizita e Borrellit vërteton rëndësinë që BE-ja u kushton marrëdhënieve me Turqinë. "Turqia është vend kandidat dhe aleate e NATO-s. Marrëdhëniet tona duhet të reflektojnë të gjitha këto elemente", tha zëdhënësi i KE-së.

Stano më tej nënvizoi se të gjitha dimensionet e marrëdhënieve Turqi-BE do të diskutohen në Këshillin e marrëdhënieve me jashtë më 13 korrik.